சிவகங்கை கூட்டுக் குடிநீா் திட்டப் பணிக்கான தடை நீக்கம்

காவிரி ஆற்றில் சிவகங்கை கூட்டுக் குடிநீா்த் திட்டப் பணிகளை மேற்கொள்வதற்கு விதிக்கப்பட்ட தடையை நீக்கி, அந்தப் பணிகளை விரைந்து முடிக்க சென்னை உயா்நீதி மன்ற மதுரை அமா்வு புதன்கிழமை உத்தரவிட்டது.

திருச்சியைச் சோ்ந்தவரும், மக்கள் நல ஆலோசனை மையத்தின் தலைவருமான விருமாண்டி தாக்கல் செய்த மனு:

கடந்த 2020-ஆம் ஆண்டு கரூா் மாவட்டம், குளித்தலை, குமாரமங்கலம் பகுதிகளில் உள்ள காவிரி ஆற்றில் சிவகங்கை கூட்டுக் குடிநீா்த் திட்டப் பணிகள் தொடங்கப்பட்டன. இதனால், குமாரமங்கலம் பகுதியில் குடிநீா்த் தட்டுப்பாடு ஏற்படும் நிலை உள்ளது.

எனவே, கரூா் மாவட்டம், உமையாள்புரம், மருதூா் பகுதிகளில் காவிரி ஆற்றின் குறுக்கே தடுப்பணை கட்ட வேண்டும். அதுவரை சிவகங்கை கூட்டுக் குடிநீா்த் திட்டத்தைச் செயல்படுத்தத் தடை விதித்து உத்தரவிட வேண்டும் என அவா் கோரியிருந்தாா்.

இந்த மனுவை கடந்த மாதம் விசாரித்த சென்னை உயா்நீதிமன்ற மதுரை அமா்வு, காவிரி ஆற்றிலிருந்து சிவகங்கை கூட்டுக் குடிநீா்த் திட்டப் பணிகளை மேற்கொள்ளத் தடை விதித்து உத்தரவிட்டது.

இந்தக் கூட்டுக் குடிநீா்த் திட்டத்துக்கு விதிக்கப்பட்ட தடையை நீக்குவதுடன், பணிகளை விரைந்து முடிக்க உத்தரவிட வேண்டும் என சிவகங்கை தொகுதி சட்டப்பேரவை உறுப்பினா் பி.ஆா். செந்தில்நாதன் சென்னை உயா்நீதிமன்ற மதுரை அமா்வில் இடையீட்டு மனு தாக்கல் செய்தாா்.

இந்த மனு உயா்நீதிமன்ற நீதிபதிகள் எம்.எஸ். ரமேஷ், ஏ.டி. மரிய கிளாட் அமா்வு முன் புதன்கிழமை மீண்டும் விசாரணைக்கு வந்தது.

அப்போது இடையீட்டு மனுதாரா் தரப்பில், வழக்குரைஞா் கே.ஆா். பாரதிகண்ணன் முன்னிலையாகி முன்வைத்த வாதம்:

இடையீட்டு மனுதாரா் கடந்த 2014-ஆம் ஆண்டு முதல் 2019-ஆம் ஆண்டு வரை சிவகங்கை மக்களவை உறுப்பினராக (அ.தி.மு.க) பதவி வகித்துள்ளாா். அப்போது, சிவகங்கைக்கு காவிரி கூட்டுக் குடிநீா்த் திட்டத்தைச் செயல்படுத்த வேண்டும் என தொடா்ந்து வலியுறுத்தி வந்தாா். இதன்படி, கடந்த 2020-ஆம் ஆண்டில் சிவகங்கை மாவட்டத்தில் உள்ள 3 நகராட்சிகள், 8 பேரூராட்சிகள், 2,452 குடியிருப்புகள் பயன்பெறும் வகையில், காவிரி கூட்டுக் குடிநீா்த் திட்டத்தைச் செயல்படுத்த ரூ.1,823 கோடியை முன்னாள் முதல்வா் எடப்பாடி கே. பழனிசாமி ஒதுக்கி அரசாணை பிறப்பித்தாா். இந்தப் பணிகள் கடந்த 2021-ஆம் ஆண்டில் தொடங்கி, 2023-ஆம் ஆண்டில் முடிக்க கால நிா்ணயம் செய்யப் பட்டது. இந்தக் கூட்டுக் குடிநீா்த் திட்டப் பணிகள் 85 சதவீதம் முடிவடைந்துவிட்டன.

இதனிடையே, இந்தத் திட்டம் தொடா்பான பணிகளை மேற்கொள்ள சென்னை உயா்நீதிமன்ற மதுரை அமா்வு தடை விதித்தது ஏற்புடையதல்ல. சிவகங்கை மாவட்ட பொதுமக்கள் குடிநீருக்காக சிரமப்பட்டு வருகின்றனா். ஏற்கெனவே, நீதிமன்றம் விதித்த தடையை நீக்குவதுடன், எஞ்சியுள்ள குடிநீா்த் திட்டப் பணிகளை விரைந்து முடிக்க உத்தரவிட வேண்டும் என்றாா்.

இதைப் பதிவு செய்து கொண்ட நீதிபதிகள் பிறப்பித்த உத்தரவு:

அதிகாரிகளின் விரிவான ஆய்வுக்குப் பிறகே, சிவகங்கை கூட்டுக் குடிநீா்த் திட்டத்துக்கு ஒப்புதல் வழங்கப்பட்டது. எனவே, இந்தத் திட்டத்துக்கு ஏற்கெனவே விதிக்கப்பட்ட தடை நீக்கப்படுகிறது. சிவகங்கை கூட்டுக் குடிநீா்த் திட்டப் பணிகளை விரைந்து முடிக்க வேண்டும்.

மனுதாரா் விருமாண்டி காவிரி ஆற்றில் தடுப்பணை கட்டுவதற்கு சம்பந்தப்பட்ட அதிகாரிகளிடம் கோரிக்கை மனு அளிக்க வேண்டும். இதை அதிகாரிகள் 3 மாதங்களில் பரிசீலித்து உரிய நடவடிக்கை எடுக்க வேண்டும் என்றனா் நீதிபதிகள்.