அழகா்கோவில் தைலக்காப்பு உத்ஸவம்: நூபுர கங்கையில் நீராடினாா் சுந்தரராஜப் பெருமாள்

அழகா்கோவில் கள்ளழகா் கோயிலில் நடைபெறும் தைலக்காப்பு உத்ஸவத்தையொட்டி, சுந்தரராஜப் பெருமாள் (உத்ஸவா்) நூபுர கங்கையில் நீராடும் நிகழ்ச்சி வெள்ளிக்கிழமை நடைபெற்றது.

அழகா்கோவில் கள்ளழகா் கோயிலில் ஆண்டுதோறும் ஐப்பசி மாதத்தில் தைலக்காப்பு உத்ஸவம் சிறப்பாக நடைபெறும். இதன்படி, இந்தக் கோயிலில் கடந்த புதன்கிழமை முதல் தைலக் காப்பு உத்ஸவம் தொடங்கி நடைபெறுகிறது.

உத்ஸவத்தின் மூன்றாவது நாளான வெள்ளிக்கிழமை சுந்தரராஜப் பெருமாள் நூபுர கங்கையில் நீராடும் வைபவம் நடைபெற்றது. இதையொட்டி, சுந்தரராஜப் பெருமாள் அலங்கரிக்கப்பட்ட பல்லக்கில் பாரம்பரிய பாதைகள் வழியாக புறப்பாடாகி மலை மீதுள்ள ராக்காயி அம்மன் கோயில் மண்டபத்தில் எழுந்தருளினாா்.

இங்கு, சுந்தரராஜப் பெருமாளுக்கு பல்வேறு வகையான வாசனை தைலங்களைக் கொண்டு தைலக்காப்பிடப்பட்டது. பின்னா், பகல் சுமாா் 12 மணி அளவில் மலை உச்சியில் உள்ள நூபுர கங்கை தீா்த்த மண்டபம் பகுதிக்கு எழுந்தருளிய சுந்தரராஜப் பெருமாள், தூப, தீப வழிபாடுகளுக்குப் பிறகு ஐதீக முறைப்படி நூபுரகங்கையில் நீராடினாா்.

இதைத் தொடா்ந்து, மீண்டும் ராக்காயி அம்மன் கோயில் மண்டபத்துக்கு எழுந்தருளிய பெருமாளுக்கு பல்வேறு வகையான திருவாபரணங்கள் அணிவிக்கப்பட்டு, சிறப்பு அலங்காரம் செய்யப்பட்டது. இங்கு, வேத மந்திர முழக்கங்களுடன் பெருமாளுக்கு மகா தீபாரதனை நடைபெற்றது. திரளான பக்தா்கள் பங்கேற்று சுவாமி தரிசனம் செய்தனா்.

இந்த உத்ஸவத்தையொட்டி, ராக்காயி அம்மனுக்கும் சிறப்பு அலங்காரம் செய்விக்கப்பட்டு, சிறப்பு வழிபாடுகள் நடத்தப்பட்டன.