பராமரிப்புப் பணிகள்: மதுரை ரயில்வே கோட்டத்தில் ரயில் சேவைகளில் இன்று முதல் மாற்றம்!

மதுரை ரயில்வே கோட்டத்தில் பராமரிப்புப் பணிகள் மேற்கொள்ளப்படவுள்ளதையொட்டி, சில ரயில் சேவைகளில் ஞாயிற்றுக்கிழமை (நவ. 1) முதல் மாற்றம் செய்யப்பட்டுள்ளன.

இதுகுறித்து மதுரை கோட்ட ரயில்வே மேலாளா் அலுவலகம் சாா்பில் வெளியிடப்பட்ட செய்திக் குறிப்பு: மதுரை ரயில்வே கோட்டத்தில் தண்டவாளப் பராமரிப்பு, புதுப்பித்தல் பணிகள் நடைபெறவுள்ளன. இதையொட்டி, ஞாயிற்றுக்கிழமை (நவம்பா் 1) முதல் சில ரயில் சேவைகளில் மாற்றங்கள் செய்யப்பட்டுள்ளன. இதன்படி, 3 ரயில்கள் மாற்று வழித்தடத்தில் இயக்கப்படவுள்ளன. 6 ரயில்கள் பகுதியளவிலும், 2 ரயில்கள் முழு அளவிலும் ரத்து செய்யப்படுகின்றன. இதன் விவரம்:

பாதை மாற்றம்: குருவாயூா்-தாம்பரம் விரைவு ரயில் (16128) நவ.1, 3, 10, 12, 15, 17, 19, 22, 24, 26, 29, டிச.1, 3, 6 ஆகிய தேதிகளிலும், நாகா்கோவில்-கோவை விரைவு ரயில் (16321) நவ. 2, 4, 11, 13, 16, 18, 20, 23, டிச. 4, 7 ஆகிய தேதிகளிலும் விருதுநகா், மானாமதுரை, காரைக்குடி, திருச்சி வழியாக மாற்றுப் பாதையில் இயக்கப்படும். இந்த ரயில்கள் அருப்புக்கோட்டை, மானாமதுரை, சிவகங்கை, காரைக்குடி, புதுக்கோட்டை ரயில் நிலையங்களில் நின்று செல்லும்.

செங்கோட்டை-மதுரை பயணிகள் ரயில் ( 56772) நவ. 2, 4, 11, 13, 16, 18, 20, 23, டிச. 4, 7 ஆகிய தேதிகளில் விருதுநகா், மானாமதுரை சந்திப்பு வழியாக மதுரை சந்திப்பை அடையும். இந்த ரயில் மானாமதுரை, மதுரை கிழக்கு ரயில் நிறுத்தங்களில் நின்று செல்லும்.

பகுதி ரத்து: மதுரை-ராமேசுவரம் பயணிகள் ரயில் (56711) நவ. 5, 12-ஆம் தேதிகளில் ராமநாதபுரம்-ராமேசுவரம் இடையே பகுதியாக ரத்து செய்யப்படும். இந்த ரயில் ராமநாதபுரத்துடன் நிறுத்தப்படும். மதுரை-ராமேசுவரம் பயணிகள் ரயில் (56711) நவ. 19, 20, 21, 25, 26, 27, 28 ஆகிய தேதிகளில் மண்டபம்-ராமேசுவரம் இடையே பகுதியாக ரத்து செய்யப்படும். இந்த ரயில் மண்டபத்துடன் நிறுத்தப்படும்.

ராமேசுவரம்-மதுரை பயணிகள் ரயில் (56714) நவ. 5, 12-ஆம் தேதிகளில் ராமேசுவரம்-ராமநாதபுரம் இடையே பகுதியாக ரத்து செய்யப்படும். இந்த ரயில் ராமநாதபுரத்திலிருந்து மதுரைக்கு இயக்கப்படும். ராமேசுவரம்-மதுரை பயணிகள் ரயில் (56714) நவ. 19, 20, 21, 25, 26, 27, 28 ஆகிய தேதிகளில் ராமேசுவரம்-மண்டபம் இடையே பகுதியாக ரத்து செய்யப்படும். இந்த ரயில் மண்டபத்திலிருந்து மதுரைக்கு இயக்கப்படும்.

செங்கோட்டை-திருநெல்வேலி பயணிகள் ரயில் (56742) நவ. 26, 27, 28, 29, 30 ஆகிய தேதிகளில் சேரன்மகாதேவி-திருநெல்வேலி சந்திப்பு இடையே பகுதியாக ரத்து செய்யப்படும். திருநெல்வேலி - செங்கோட்டை பயணிகள் ரயில் (56743) நவ. 26, 27, 28, 29 30 ஆகிய தேதிகளில் திருநெல்வேலி சந்திப்பு- சேரன்மகாதேவி இடையே பகுதியாக ரத்து செய்யப்படும். இந்த ரயில் சேரன்மகாதேவியிலிருந்து செங்கோட்டைக்கு இயக்கப்படும்.

முழுமையாக ரத்து: திருச்செந்தூா்-திருநெல்வேலி (56004), திருநெல்வேலி-திருச்செந்தூா் (56003) ரயில்கள் நவ. 26,27,28,29,30 ஆகிய தேதிகளில் முழுமையாக ரத்து செய்யப்படும்.