ராமநாதபுரத்தில் மீன்பிடி தொழிலாளர் கூட்டமைப்பு ஆர்ப்பாட்டம்

ராமநாதபுரம் மாவட்ட ஆட்சியர் அலுவலகம் முன்பாக மீன்பிடித் தொழிலாளர் கூட்டமைப்பு சார்பில் கடற்கரை மண்டல மேலாண்மைத் திட்டம் வெளியிட்டுள்ள வரைபடங்களை ரத்து செய்ய வலியுறுத்தி புதன்கிழமை கண்டன ஆர்ப்பாட்டம் நடைபெற்றது. 
ஆர்ப்பாட்டத்துக்கு மாவட்டத் தலைவர் ஏ.பால்ச்சாமி தலைமை வகித்தார். துணைத் தலைவர் எல்.அன்னம்மாள்,துணைச் செயலாளர் ஏ.காசிலிங்கம், செயலாளர் ஜி.ஜோசப் ஆகியோர் முன்னிலை வகித்தனர். தேசிய மீனவர் பேரவையின் தலைவர் டி.குமாரவேல், கூட்டமைப்பின் மாவட்ட அமைப்பாளர் டி.மல்லிகா ஆகியோர் பேசினர்.
கடற்கரை மண்டல மேலாண்மைத் திட்டம் வெளியிட்டுள்ள வரைபடங்களில் மீனவர்களுக்கான நீண்டகால குடியிருப்புத் திட்டங்கள்,  மீனவ சமுதாயத்தின் பொதுச் சொத்துக்கள்,சமூககட்டமைப்புகள் போன்ற எவையும் குறிப்பிடப்படவில்லை. மீனவர்களுக்கு ஒத்துப் போகாத வரைபடத்தை வெளியிட்டுள்ள தேசிய பசுமை தீர்ப்பாயத்தின் உத்தரவை அவமதிப்பதாகவும் உள்ளது.
 மேலும் கடற்கரை மேலாண்மைத் திட்டத்தின் விபரங்களை தமிழ் மொழியில் வெளியிட்டால் மட்டுமே ஏற்றுக் கொள்வோம் என்பதையும் வலியுறுத்தி இந்த ஆர்ப்பாட்டம் நடைபெற்றது.
   கூட்டமைப்பின் பொருளாளர் ஆர்.மீனாள் நன்றி கூறினார்.