செயலி மூலம் தகவல் திருடி இளம்பெண்களை மிரட்டிய இளைஞர் கைது

ராமநாதபுரம் அருகே உள்ள தேவிபட்டினத்தில் செல்லிடப்பேசி செயலி மூலம் தகவல்களை திருடி, இளம்பெண்களை மிரட்டிய இளைஞரை போலீஸார் புதன்கிழமை கைது செய்தனர்.
 ராமநாதபுரம்  மாவட்டம்  தேவிபட்டினம்  அருகே  தாமரையூரணி  கிராமத்தைச்  சேர்ந்தவர் தினேஷ்குமார் (24). இவர், தனது உறவுக்கார இளம் பெண்களிடம்  அவர்களது செல்லிடப்பேசியில் செயலி ஒன்றை பதிவிறக்கம் செய்து கொடுத்து, அதன் மூலம் அவர்களது அந்தரங்க விவரங்களை தெரிந்து கொண்டு அவற்றை முகநூலில் பதிவிடப் போவதாக மிரட்டினாராம். இதே போல 5-க்கும் மேற்பட்ட பெண்களை தினேஷ்குமார் மிரட்டியதாக தெரிகிறது. இதுகுறித்து தாமரையூரணி  கிராமத்தைச்  சேர்ந்த சக்தி மனைவி  ராதா (30), அளித்த புகாரின் பேரில் தேவிபட்டினம் காவல் ஆய்வாளர் முத்து பிரேம்சந்த் வழக்குப்பதிந்து தினேஷ்குமாரை கைது செய்து விசாரணை நடத்தி வருகிறார்.