பரமக்குடி தீயணைப்பு நிலையப் பகுதியில்  குடிநீர் குழாய் உடைப்பு: 4 நாள்களாக குடிநீரின்றி பொதுமக்கள் தவிப்பு

பரமக்குடி தீயணைப்பு நிலையம் பகுதியில் குழாய் உடைப்பு ஏற்பட்டு தண்ணீர் வீணாவதால், கிழக்குப் பகுதியில் வசிக்கும் பொதுமக்கள் குடிநீரின்றி மிகவும் சிரமத்துக்குள்ளாகி வருகின்றனர்.
பரமக்குடி நகராட்சி ஆணையாளர் குடியிருப்பு பகுதியின் பின்புறம் உள்ள நீர்த்தேக்க மேல்நிலைத் தொட்டியிலிருந்து பங்களா ரோடு, காமராஜர் நகர், திருவள்ளுவர் நகர், பள்ளிவாசல் தெரு ஆகிய பகுதிகளுக்கு பகிர்மான குழாய்கள் மூலம் குடிநீர் பிரித்து வழங்கப்பட்டு வருகிறது.
இதில் கடந்த சில தினங்களுக்கு முன்பு செளராஷ்ட்ர மேல்நிலைப் பள்ளி நுழைவாயில் முன்பு பகிர்மான குழாயில் உடைப்பு ஏற்பட்டு சரி செய்யப்பட்டது. இந்நிலையில் 
கடந்த 4 தினங்களுக்கு முன்பு சரிசெய்யப்பட்ட பகுதியிலேயே மீண்டும் உடைப்பு ஏற்பட்டு குடிநீர் முழுவதும் 4 நாள்களாக வீணாக வெளியேறி வருகிறது. 
தொடர்ந்து 2 தினங்களாக மழை பெய்ததால் அப்பகுதியில் கழிவுநீர் மற்றும் மழைநீர் தேங்கியுள்ளது. இதனால் 
குடிநீர் குழாயை சரிசெய்யும் பணி தொடர்ந்து தாமதமாகி வருகிறது.  இதனால் நகரின் கிழக்குப் பகுதியில் உள்ள பொதுமக்கள் குடிநீர் கிடைக்காமல் மிகவும் சிரமத்துக்குள்ளாகி வருகின்றனர்.அப்பகுதியில் வசிக்கும் மக்கள் லாரி மற்றும் டிராக்டர்களில் வந்து விற்பனை செய்யும் நபர்களிடம் குடம் ரூ. 5 செலுத்தி வாங்கும் நிலை ஏற்பட்டுள்ளது.  
பொதுமக்களின் அவசிய தேவையான குடிநீரை முறையாக கிடைக்கச் செய்திட மாவட்ட ஆட்சியர் உரிய 
நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.