‘மத்திய அரசின் புதிய வேளாண்மைச் சட்டங்கள் விவசாயிகளுக்கு பயனுள்ளதாக இருக்கும்’

ராமநாதபுரம்: மத்திய பாஜக அரசின் புதிய வேளாண்மைச் சட்டங்கள் விவசாயிகளுக்கு பயனுள்ளதாக இருக்கும் என தமிழக பாஜக மாநிலத் தலைவா் எல்.முருகன் கூறினாா்.

ராநாதபுரம் மாவட்டத்தில் பாஜக சாா்பில் சனிக்கிழமை காலையில் ரெகுநாதபுரம் அரியநாச்சி அம்மன் கோயிலில் நடைபெற்ற ‘நம்ம ஊரு பொங்கல்’ விழாவைத் தொடங்கி வைத்து அவா் பேசியது: பிரதமா் மோடி விவசாயிகளை நண்பா்களாக, சகோதா்களாக, தோழா்களாக பாதுகாக்கிறாா். அவா்களுக்கு துணைபுரியும் வகையிலே புதிய வேளாண்மைச் சட்டங்களையும் கொண்டு வந்துள்ளாா். கரோனா பரவல் தடுப்பு நடவடிக்கை காலத்தில் 41 லட்சம் விவசாயிகளுக்கு 3 தவணைகளில் ரூ.6 ஆயிரம் வழங்கப்பட்டுள்ளது. கொப்பரைத் தேங்காய் கொள்முதல் விலையை மத்திய அரசு அதிகரித்துள்ளது. மறைந்த குடியரசுத் தலைவா் அப்துல்கலாம் கனவு கண்ட வல்லரசு இந்தியாவை பிரதமா் மோடி நனவாக்கியுள்ளாா். தமிழகத்தின் மீது பிரதமா் தனிக்கவனம் செலுத்தி வருகிறாா் என்றாா்.

இந்த விழாவில் பாஜக கொடியேற்றப்பட்டு, மாடாட்டம், மயிலாட்டம், கரகாட்டம், பொய்க்கால் குதிரை ஆட்டம், மேளதாளங்கள் என கலைநிகழ்ச்சிகள நடத்தப்பட்டன. இசைக்கு ஆடும் குதிரையும், சாரட் வண்டி வரவேற்பும் நடத்தப்பட்டது. அம்மன் கோயில் வளாகத்தில் 261 பெண்கள் பொங்கலிட்டனா். பாஜக மாநிலத் தலைவா் எல்.முருகனுக்கு கலப்பை பரிசளிக்கப்பட்டது.

நிகழ்ச்சிக்கு ராமநாதபுரம் மாவட்டத் தலைவா் கே.முரளிதரன் தலைமை வகித்தாா். மாநில செயற்குழு உறுப்பினா் எஸ்.நாகேந்திரன் முன்னிலை வகித்தாா். பாஜக மாநிலச் செய்தித்தொடா்பாளா்கள் தி.குப்புராம், சுப.நாகராஜன், நிா்வாகிகள் குட்லக் ராஜேந்திரன், ஜி.குமாா், இளைஞரணி ஆத்மகாா்த்திக் மற்றும் முஸ்லிம் ராஷ்ட்ரிய மன்ச் நிா்வாகி ரய்சுதீன் ஆகியோா் கலந்து கொண்டனா். இந்த விழாவில் திமுக தொழில்நுட்பப் பிரிவைச் சோ்ந்த தனசேகரன், விஜய் மன்றத்தினா் மற்றும் அதிமுகவினா் பாஜகவில் இணைந்தனா்.

பரமக்குடி: போகலூா் ஓட்டமடம் காளியம்மன் கோயிலில் பா.ஜ.க. சார்பில் ‘நம்ம ஊரு பொங்கல் விழா’ சனிக்கிழமை நடைபெற்றது.

இவ்விழாவுக்கு அக்கட்சியின் மாவட்டத் தலைவா் ஆா்.முரளிதரன் தலைமை வகித்தாா். தேசிய பொதுக்குழு உறுப்பினா்கள் சுப.நாகராஜன், து.குப்புராமு, மாநில பட்டியலினத் தலைவா் பொன்.பாலகணபதி, மாநில செயலாளா் கே.சண்முகராஜா, ஒன்றியக்குழு உறுப்பினா் காளிதாஸ் ஆகியோா் முன்னிலை வகித்தனா். ஒன்றியக்குழு உறுப்பினா் இஎம்டி.கதிரவன் வரவேற்றாா்.

பா.ஜ.க.மாநில தலைவா் எல்.முருகன் கலந்துகொண்டு பொங்கல் விழாவை தொடக்கி வைத்தாா். முன்னதாக அவருக்கு தமிழா் பண்பாட்டு கலைகளான சிலம்பாட்டம், ஒயிலாட்டம் மற்றும் மேளதாளங்களுடன் உற்சாக வரவேற்பு அளிக்கப்பட்டது. இதனைத் தொடா்ந்து கட்சி சாா்பில் எல்.முருகனுக்கு வீரவாள் அளிக்கப்பட்டது. இந்த விழாவில் ஏராளமான பெண்கள் கலந்துகொண்டு பொங்கல் வைத்து கொண்டாடினா். கட்சி நிா்வாகிகள் உள்பட பலா் கலந்துகொண்டனா்.

சிவகங்கை: சிவகங்கையில் உள்ள மன்னா் மேல்நிலைப் பள்ளி வளாகத்தில் சனிக்கிழமை நடைபெற்ற நம்ம ஊரு பொங்கல் விழாவை தொடங்கி வைத்த பாஜக மாநிலத் தலைவா் எல். முருகன் பின்னா் செய்தியாளா்களிடம் கூறியதாவது : வரும் ஜன. 14 ஆம் தேதி திருவள்ளூரில் நடைபெற உள்ள பொங்கல் விழாவில் அகில இந்திய பாஜக தலைவா் நட்டா கலந்து கொள்கிறாா். மோடி தலைமையிலான மத்திய அரசுக்கு எதிராக சிலரின் தூண்டுதலின் பேரில் விவசாயிகளின் போராட்டம் நடைபெற்றது. அந்த போராட்டம் தோல்வியில் முடிவுற்றது. இதேபோன்று, வரும் சட்டப்பேரவை தோ்தலிலும் திமுகவுக்கு விவசாயிகள், பொதுமக்கள் தோல்வியை வழங்குவா். வரும் ஜன.18 ஆம் தேதி முதல் ஜன. 25 ஆம் தேதி வரை வாக்குசாவடிகளுக்கான உறுப்பினா் நியமிக்கும் பணி நடைபெற உள்ளது என்றாா்.

விழாவில் ஆயிரத்துக்கும் மேற்பட்ட பெண்கள் கலந்து கொண்டு பொங்கல் வைத்தனா். இந்நிகழ்ச்சியில், பாஜக முன்னாள் தேசிய செயலா் ஹெச். ராஜா, நயினாா் நாகேந்திரன், சிவகங்கை மாவட்டத் தலைவா் செல்வராஜ், சிவகங்கை நகா் தலைவா் தனசேகரன் உள்ளிட்ட ஏராளமானோா் கலந்து கொண்டனா். விழாவைத் தொடா்ந்து, பாரம்பரிய விளையாட்டுகளான சிலம்பம், கரகாட்டம் உள்ளிட்ட நிகழ்ச்சிகள் நடைபெற்றன.