இளையான்குடி அருகே குழாயில் உடைப்பு சாலையில் பெருக்கெடுத்த காவிரி கூட்டுக்குடிநீர்

சிவகங்கை மாவட்டம் இளையான்குடி அருகே காவிரி கூட்டுக் குடிநீர் திட்டக் குழாயில் திங்கள்கிழமை உடைப்பு ஏற்பட்டு சாலையில் தண்ணீர் பெருக்கெடுத்து பாய்ந்தது.
  காவிரி கூட்டுக் குடிநீர் திட்டம் மூலம் சிவகங்கை மாவட்டத்தில் சிவகங்கை, இளையான்குடி பகுதி மக்கள் குடிநீர் வசதி பெறுகின்றனர். இளையான்குடியை கடந்து ராமநாதபுரம் மாவட்டத்துக்கும் இத்திட்டத்திலிருந்து குடிநீர் விநியோகம் செய்யப்படுகிறது. ஆனால் இத்திட்டத்தை பராமரிக்க போதுமான நிதி ஒதுக்கீடு செய்யப்படவில்லை என்றும் போதிய ஊழியர்கள் நியமிக்கப்படவில்லை என்றும் கூறப்படுகிறது.
 இதனால், திருச்சியிலிருந்து ராமநாதபுரம் மாவட்டம் வரை செல்லும் இக்குடிநீர் திட்டக் குழாய்களில் பல இடங்களில் உடைப்பு ஏற்பட்டு தண்ணீர் வீணாக வெளியேறும் சம்பவங்கள் தொடர்ந்து நடந்து வருகின்றன. 
பின்னர் தாமதமாக குடிநீர் திட்டத்தை பராமரிக்கும் குடிநீர் வடிகால் வாரியத்தினர் உடைப்பை சரி செய்யும் நிலை இருந்து வருகிறது. இந் நிலையில் கடந்த நான்கு நாள்களுக்கு முன்பு இளையான்குடி அருகே இந்திராநகர்-திருவுடையார்புரம் இடையே காவிரி கூட்டுக்குடிநீர் திட்டக் குழாயில் உடைப்பு ஏற்பட்டு அதிலிருந்து வெளியேறும் தண்ணீர், அருகேயுள்ள சாலையில் பெருக்கெடுத்து ஓடி அருகேயுள்ள வயல்களில் தேங்கி வருகிறது. 
 இது குறித்து குடிநீர் திட்டத்தை பராமரிக்கும் குடிநீர் வடிகால் வாரியத்தினருக்கு தகவல் தெரிவிக்கப்பட்டும் இதுவரை குழாய் உடைப்பை சரி செய்ய நடவடிக்கை எடுக்கவில்லை. இதனால் இளையான்குடி பகுதியைக் கடந்து ராமநாதபுரம் மாவட்டத்துக்குச் செல்லும் காவிரி நீர் செல்வதில் சிக்கல் ஏற்பட்டுள்ளது.