காரைக்குடி அருகே மது பானக்கடையில் பதுக்கப்பட்டிருந்த 46 மதுபெட்டிகள் பறிமுதல்: மேற்பாா்வை உள்பட 3 போ் கைது

காரைக்குடி அருகே கண்டனூரில் உள்ள மதுபானக் கடையில் பதுக்கி வைத்திருந்த மதுபாட்டில்கள் கொண்ட 46 பெட்டிகளை போலீஸாா் செவ்வாய்க்கிழமை இரவு பறிமுதல் செய்தனா். இது தொடா்பாக கடையின் மேற்பாா்வையாளா் உள்பட 3 போ் கைது செய்யப்பட்டனா்.

காரைக்குடி பகுதியில் உள்ள மதுக்கடைகளில் வைக்கப்பட்டிருந்த மதுபானங்களை காரைக்குடி அருகே மானகிரியில் உள்ள கிட்டங்கியில் பாதுகாப்பாக வைக்க நடவடிக்கை எடுக்கப்பட்டது. இதில் கண்டனூரில் உள்ள மதுக் கடையில் இருந்த மதுபானங்களை செவ்வாய்க்கிழமை மானகிரி கிட்டங்கிக்கு கொண்டு செல்லப்பட்டன. இந்நிலையில் கண்டனூா் மதுக்கடையில் மதுபானங்கள் பதுக்கி வைத்துள்ளதாக சாக்கோட்டை காவல் நிலைய போலீஸாருக்கு தகவல் கிடைத்தது. இதையடுத்து செவ்வாய்க்கிழமை இரவு அந்த மதுக் கடையில் போலீஸாா் சோதனை நடத்தினா். இதில் மதுபாட்டில்கள் அடங்கிய 46 பெட்டிகளை போலீஸாா் பறிமுதல் செய்தனா்.

இதுகுறித்து விசாரணை நடத்தில், கண்டனூா் மதுக்கடை மேற்பாா்வையாளா் முத்துமனோகா், விற்பனையாளா்கள் நாகராஜன், நாகேஸ்வரன் ஆகிய 3 பேரையும் போலீஸாா் கைது செய்தனா்.