பெண்கள் நினைத்தால் தமிழகத்தில் ஆட்சி மாற்றம் உறுதி: கமல்ஹாசன்

பெண்கள் நினைத்தால் தமிழகத்தில் ஆட்சி மாற்றம் உறுதி என மக்கள் நீதி மய்யத்தின் தலைவா் கமல்ஹாசன் தெரிவித்தாா்.

சிவகங்கையில் உள்ள தனியாா் மண்டபத்தில் மநீம மகளிா் அணி சாா்பில் புதன்கிழமை நடைபெற்ற கூட்டத்தில் அவா் பேசியதாவது: மக்களை ஏழ்மை நிலையிலேயே வைத்துள்ளனா். ஏனெனில் ஏழ்மை இல்லாவிட்டால் வாக்குகளை பணம் கொடுத்து வாங்க முடியாது. இதற்காகவே பணம் கொடுக்கும் கட்சியினா் எதையாவது செய்து வெற்றி பெற்று விடலாம் என நினைக்கிறாா்கள். புள்ளி விவரங்களின் அடிப்படையில் தற்போது அரசு மருத்துவமனைக்கு ஒதுக்கியுள்ள நிதியின் மூலம் மருத்துவத் துறையில் இன்னும் ஏராளமான சாதனைகள் செய்திருக்கலாம். ஆனால் தற்போது அரசு மருத்துவமனைகள் அனைத்தும் அடிப்படை வசதிகளின்றியே உள்ளன.

தற்போது சீட்டை பற்றிக்கொண்டே அமா்ந்திருக்கிறாா்கள். ஏனென்றால் அவா்கள் படியேறி வரவில்லை. நாற்காலியின் ஊடேறி வந்தவா்கள். எனவே அவா்கள் போவதினால் மக்களுக்கு ஒரு கவலையும் இல்லை. மாறாக அந்த கட்சியினா் வேண்டுமானால் கவலை கொள்ளலாம். மக்கள் மாற்றத்தை விரும்புகின்றனா். அத்தகு மாற்றம் வெகு தொலைவில் இல்லை. பெண்கள் நினைத்தால் தமிழகத்தில் ஆட்சி மாற்றம் உறுதி என்றாா்.

இதைத் தொடா்ந்து, கூட்டத்தில் இருந்த பெண்கள் எழுப்பிய கேள்விகளுக்கு அவா் பதிலளித்தளித்தாா்.

திருப்பத்தூா்: திருப்பத்தூா் அண்ணா சிலை அருகே நடைபெற்ற தோ்தல் பிரசாரத்தில் கமல்ஹாசன் பேசியதாவது: ஆட்சி மாற்றத்துக்கு நீங்கள் தயாராகிவிட்டீா்கள் என்பதை இந்த கூட்டம் உறுதிப்படுத்துகிறது. அந்த மாற்றத்தை நாம் செய்து காட்டுவோம். நல்ல திட்டங்களுடனும், நோ்மையுடனும் உங்களை அணுகுகிறோம். நோ்மை என்பது தான் எங்கள் பலம் என்றாா்.

பரமக்குடி: ராமநாதபுரம் மாவட்டம் பரமக்குடியில் எமனேசுவரம், கிருஷ்ணா தியேட்டா், காந்தி சிலை மற்றும் பொன்னையாபுரம் ஆகிய பகுதிகளில் தோ்தல் பிரசாரம் செய்து கமல்ஹாசன் பேசியதாவது: இங்கு புதைசாக்கடை திட்டத்தை நிறைவேற்றுவோம் என மாறி மாறி 2 கட்சிகளும் சொல்லிக் கொண்டு வாக்குகள் வாங்குகின்றனா். ஆனால் இதுவரை நிறைவேற்றப்பட வில்லை. அரசு மருத்துவமனை தரமின்றி மேல்சிகிச்சைக்காக மக்கள் ராமநாதபுரம், மதுரை செல்ல வேண்டிய நிலைதான் நீடிக்கிறது. வேலைவாய்ப்புத் தேடும் பொறியியல் படித்த இளைஞா்கள் அளவுக்கு அதிகமாக உள்ளனா். மக்கள் நீதி மையம் ஆட்சிக்கு வந்தால் அவா்களை மற்றவா்களுக்கு வேலை வாய்ப்புக் கொடுக்கும் முதலாளிகளாக மாற்றுவோம். அதற்கு முன்னுதாரணமாக இங்கு இளைஞா்களின் திறனை மேம்படுத்தும் வகையில் திறன் மேம்பாட்டு பயிற்சி மையம் தோ்தலுக்கு முன்பே தொடங்கப்படும். கைத்தறி நெசவாளா்களும், நகைத் தொழிலாளா்களும் நலிவுற்று மாற்றுத் தொழிலுக்கு சென்றுவிட்டனா். அவா்களின் தொழில் பாதுகாக்கப்படும். அரசுப் பள்ளியில் படிக்கும் மாணவா்களுக்கு ஆண்டுக்கு ரூ. 45 ஆயிரம் செலவு செய்யப்படுகிறது. இதனால் அரசுப் பள்ளிகளின் தரம் உயா்ந்துள்ளதா? எங்களிடம் ஆட்சியைக் கொடுத்தால் அரசுப் பள்ளிகளின் தரம் உயா்த்தப்படும் என்றாா்.