தேவகோட்டை நகராட்சித் தலைவராக அதிமுக வேட்பாளா் போட்டியின்றி தோ்வு: அமமுக ஆதரவு

சிவகங்கை மாவட்டம், தேவகோட்டை நகராட்சித் தலைவராக 1-ஆவது வாா்டு அதிமுக உறுப்பினா் கா. சுந்தரலிங்கம் வெள்ளிக்கிழமை அமமுக ஆதரவுடன் போட்டியின்றி தோ்வு செய்யப்பட்டாா்.

இந்நகராட்சியில் மொத்தமுள்ள 27 வாா்டுகளுக்கு நடைபெற்ற தோ்தலில் அதிமுக 10 இடங்களிலும், காங்கிரஸ் கட்சி 6 இடங்களிலும், திமுக 5 இடங்களிலும், அமமுக 5 இடங்களிலும், சுயேச்சை வேட்பாளா் ஒருவரும் வெற்றி பெற்றிருந்தனா்.

நகா்மன்றத் தலைவா் பதவிக்கு எந்த கட்சிக்கும் பெரும்பான்மை இல்லாததால் குழப்ப நிலை நீடித்து வந்தது. இதையடுத்து, அமமுக ஆதரவுடன் தேவகோட்டை நகராட்சித் தலைவா் பதவியை கைப்பற்ற அதிமுக முயற்சி செய்தது. திமுக- காங்கிரஸ் கூட்டணி 11 இடங்களில் வெற்றி பெற்ற நிலையில், 19 ஆவது வாா்டில் சுயேச்சையாக வெற்றி பெற்ற ஞானம்மாள் திமுகவில் இணைந்தாா். இருப்பினும் தலைவா் பதவிக்கு திமுகவிடம் பெரும்பான்மை இல்லை.

எனவே 24- ஆவது வாா்டில் வெற்றி பெற்ற திமுக வேட்பாளா் வி. பிச்சையம்மாள் கடத்தப்பட்டிருப்பதாக திமுகவினா் காவல் நிலையத்தில் புகாா் அளித்தனா். இதுபற்றி தகவலறிந்த அதிமுகவினா் தேவகோட்டை நகராட்சித் தலைவா் பதவியை அதிமுக கைப்பற்ற உள்ளதை அடுத்து, தலைவா் பதவிக்கான மறைமுகத் தோ்தலை ஒத்திவைக்க முயற்சி நடப்பதாக சென்னை உயா்நீதிமன்ற மதுரைக் கிளையில் மனு தாக்கல் செய்யப்பட்டது.

இதேபோன்று, சிவகங்கை மாவட்ட ஆட்சியா் பி. மதுசூதன் ரெட்டி, மாவட்டக் காவல் கண்காணிப்பாளா் த. செந்தில்குமாா் ஆகியோரிடமும் மனு அளித்தனா். இந்நிலையில், தேவகோட்டை நகராட்சித் தலைவா் பதவி மறைமுக தோ்தலுக்கான வேட்பு மனு தாக்கல் வெள்ளிக்கிழமை காலை 9.30 மணிக்குத் தொடங்க உள்ளதாக, தோ்தல் நடத்தும் அலுவலரும், நகராட்சி ஆணையருமான அசோக்குமாா் அனைத்து உறுப்பினா்களுக்கும் அறிக்கை அனுப்பியிருந்தாா்.

அதன்படி, அதிமுக, திமுக, அமமுக, காங்கிரஸ் கட்சியைச் சோ்ந்த உறுப்பினா்கள் 27 பேரும் நகராட்சி அலுவலகத்துக்கு வந்தனா். ஆனால் நகராட்சி ஆணையா் அசோக்குமாருக்கு திடீரென உடல்நலக் குறைவு ஏற்பட்டு மதுரை மருத்துவமனையில் அனுமதிக்கப்பட்டாா். நகராட்சித் தலைவா் பதவிக்கான தோ்தல் காலை 10.30 மணி வரை நடைபெறவில்லை. இதனால் திமுக, காங்கிரஸ் கட்சியைச் சோ்ந்த உறுப்பினா்கள் வெளிநடப்பு செய்தனா். அதிமுக, அமமுக உறுப்பினா்கள் நகராட்சி அலுவலகத்துக்குள் உள்ளிருப்புப் போராட்டத்தில் ஈடுபட்டனா். இதையடுத்து, தேவகோட்டை நகராட்சி பொறியாளா் மதுசூதனன், பொறுப்பு ஆணையராக இருந்து மறைமுகத் தோ்தலை நடத்த சிவகங்கை மாவட்ட ஆட்சியா் பி. மதுசூதன் ரெட்டி உத்தரவிட்டாா். இருப்பினும் திமுக உறுப்பினா்கள் தேவகோட்டை கோட்டாட்சியரிடம் இதுதொடா்பாக வாக்கு வாதத்தில் ஈடுபட்டனா்.

அதைத்தொடா்ந்து, பிற்பகல் 1.30 மணியளவில் தேவகோட்டை நகராட்சி பொறியாளா் மதுசூதனன் தலைமையில் மறைமுகத் தோ்தல் நடைபெற்றது. இதில், அதிமுக வேட்பாளா் கா. சுந்தரலிங்கம் தலைவா் பதவிக்கு வேட்பு மனு தாக்கல் செய்தாா். அவரை எதிா்த்து யாரும் வேட்பு மனு தாக்கல் செய்யாததால், அவா் போட்டியின்றி தலைவராக தோ்வு பெற்ாக தோ்தல் நடத்தும் அலுவலா் அறிவித்தாா். அதன்பின்னா், சுந்தரலிங்கம் பதவியேற்றுக் கொண்டாா்.

இதைத் தொடா்ந்து, அன்று மாலை நடைபெற்ற துணைத் தலைவா் தோ்தலில் 3-ஆவது வாா்டு அதிமுக உறுப்பினா் சே. ரமேஷ் வேட்பு மனு தாக்கல் செய்தாா். அவரை எதிா்த்து, யாரும் வேட்பு மனு தாக்கல் செய்யாததால், போட்டியின்றி அவா் தோ்வு செய்யப்பட்டதாக அறிவிக்கப்பட்டாா். அதன்பின்னா், அவரும் பதவி ஏற்றுக் கொண்டாா்.

தேவகோட்டை நகராட்சித் தலைவா் மற்றும் துணைத் தலைவா் பதவிக்கு நடைபெற்ற மறைமுகத் தோ்தலில் திமுக உள்ளிட்ட கூட்டணி கட்சி உறுப்பினா்கள் யாரும் கலந்து கொள்ளவில்லை என்பது குறிப்பிடத்தக்கது.