உத்தமபாளையம் அருகே இணைப்புச் சாலைப் பணிகள் மந்தம்

உத்தமபாளையம் அருகே  ஓராண்டுக்கு மேலாக நடைபெற்று வரும் இணைப்புச் சாலை பணிகளை விரைந்து முடிக்க வேண்டும் என விவசாயிகள் வலியுறுத்தியுள்ளனர்.
        உத்தமபாளையம் அருகே உ.அம்மாபட்டி முதல் புலிக்குத்தி வரையிலான பகுதியில் வாழை, தென்னை உள்பட பல்வேறு விவசாயப் பணிகள்  அதிக அளவில் நடைபெறுகின்றன. இப்பகுதியில் விவசாயிகள் விளைவித்த பொருள்களை சந்தைக்கு எடுத்துச் செல்ல சரக்கு வாகனங்கள் சென்று வர சாலை வசதியில்லாத நிலையில் மிகவும் சிரமப்பட்டனர். அதனைத் தொடர்ந்து  உ.அம்மாபட்டி முதல் புலிக்குத்தி வரையில் இணைப்புச் சாலை அமைக்க விவசாயிகள் பலமுறை கோரிக்கை விடுத்தனர். இந்நிலையில்,  4 கிலோ மீட்டர் தொலைவிற்கு தார்ச் சாலை அமைக்க முடிவு செய்யப்பட்டு அதற்கான பணிகள் நடைபெற்றன.  இதில் இடைப்பட்ட 2 கிலோ மீட்டர் தூரம் சாலை அமைப்பு பணி  கடந்த ஓராண்டுக்கு மேலாக மிக மந்தமாக நடைபெறுகிறது. சாலைப் பணிகள் முழுமை பெறாத நிலையில் விவசாய நிலங்களுக்கு விவசாயிகள் செல்ல முடியாத நிலை ஏற்பட்டதோடு , வாகனங்களும் செல்ல முடியாத நிலை உருவாகியுள்ளது. எனவே கிடப்பில் போடப்பட்ட சாலைப் பணிகளை விரைந்து முடிக்க வேண்டும் என விவசாயிகள் கோரிக்கை விடுத்துள்ளனர்.