டி.சுப்புலாபுரத்தில் சாலை சேதம்: பொதுமக்கள் அவதி

ஆண்டிபட்டி அருகே டி.சுப்புலாபுரம் கிராமத்தில் தார்ச்சாலை அடியோடு பெயர்ந்து சேதமடைந்துள்ளது.
தேனி மாவட்டம், ஆண்டிபட்டி அருகே டி.சுப்புலாபுரம் கிராமம் உள்ளது. தேனி- மதுரை சாலையில் இருந்து சுமார் 2 கிலோமீட்டர் தொலைவில்   உள்ள இந்த கிராமத்திற்கு செல்லும் சாலையில் ஒரு கிலோ மீட்டர் தூரம் நெடுஞ்சாலைத்துறை வசம்  உள்ளது. இந்த பகுதியில் நெடுஞ்சாலைத்துறை மூலம் புதிதாக சாலை அமைக்கப்பட்டுள்ளது. 
மீதமுள்ள 1 கிலோமீட்டர் தூரமுள்ள சாலை ஊராட்சி ஒன்றிய அலுவலகத்தின் கட்டுப்பாட்டில் உள்ளது.  10 ஆண்டுகளுக்கு முன்பு அமைக்கப்பட்ட இந்த சாலை தற்போது அடியோடு பெயர்ந்து குண்டும் குழியுமாக காணப்படுகிறது. இதனால்  நெசவாளர்கள் உற்பத்தி பொருள்களை கொண்டு செல்வதில் மிகுந்த சிரமப்படுகின்றனர். பள்ளி மாணவர்கள்,வாகன ஓட்டிகள், பொதுமக்கள் என அனைவரும் அவதியடைந்து வருகின்றனர்.சேதமடைந்த சாலை முழுவதும் கற்கள் சிதறி கிடப்பதால் இந்த வழியாக வரும் பாதசாரிகள் பெரும் அவதியுற்று வருகின்றனர். 
சேதமடைந்த சாலையை சீரமைக்க வேண்டும் என்று இப்பகுதி மக்கள் பலமுறை ஒன்றிய அலுவலகத்தில் புகார் மனுக்கள் கொடுத்தும் இதுவரை எந்த நடவடிக்கையும் எடுக்கவில்லையாம். எனவே டி.சுப்புலாபுரம் கிராமத்தில் சேதமடைந்து காணப்படும் ஊராட்சி ஒன்றிய சாலையை சீரமைக்க மாவட்ட நிர்வாகம் உரிய நடவடிக்கை எடுக்க வேண்டும் என்று இப்பகுதி பொதுமக்களும்,நெசவாளர்கள் கோரிக்கை விடுத்துள்ளனர்.