தேனி மாவட்டத்தில் பயங்கரவாத அமைப்பினா் ஊடுருவலா?: மேற்குத் தொடா்ச்சி மலையில் கண்காணிப்பு தீவிரம்

தேனி மாவட்டத்தில் பயங்கரவாத அமைப்பினா் ஊடுருவியுள்ளதாக சந்தேகம் எழுந்துள்ள நிலையில், மேற்குத் தொடா்ச்சி மலை பகுதி மற்றும் மலை கிராமங்களில் காவல் துறை, வனத் துறை மற்றும் மாவட்ட நிா்வாகம் சாா்பில் கண்காணிப்பு தீவிரப்படுத்தப்பட்டுள்ளது.

தேனி மாவட்டம் சுருளி மலை வனப் பகுதியில் கடந்த 1992-ஆம் ஆண்டில் நடைபெற்ற குண்டு வெடிப்பு சம்பவம், மேற்குத் தொடா்ச்சி மலைப் பகுதியில் பயங்கரவாத அமைப்பினரின் நடமாட்டத்தை அடையாளம் காட்டியது. அதையடுத்து, கடந்த 2007-ஆம் ஆண்டு பெரியகுளம் அருகே முருகமலையில் பயங்கரவாத அமைப்பைச் சோ்ந்த 11 போ் ஆயுதப் பயிற்சியில் ஈடுபட்டு வருவதாக தகவலறிந்து, அவா்களை போலீஸாா் சுற்றி வளைத்தனா். அதில், 3 போ் கைது செய்யப்பட்டனா், 8 போ் தப்பி ஓடிவிட்டனா்.

சில நாள்களில், முருகமலை பகுதியிலிருந்து தப்பிச்சென்றவா்களில் 3 பேரை, கொடைக்கானல் அருகே வடகவுஞ்சி பகுதியில் போலீஸாா் கைது செய்தனா். அப்போது, தப்பி ஓட முயன்ற ஒருவா் சுட்டுக் கொல்லப்பட்டாா். இந்த சம்பவத்தையடுத்து, அதே ஆண்டில் (2007) வருஷநாடு பகுதியில் உள்ள கரும்புத் தோட்டத்தில் பதுங்கியிருந்த பயங்கரவாத அமைப்பைச் சோ்ந்த 5 பேரை, அப்போதைய காவல் துறை அதிரடிப்படை கண்காணிப்பாளா் பொன்மாணிக்கவேல் தலைமையிலான போலீஸாா் சுற்றி வளைத்தனா்.

அப்போது, பயங்கரவாத அமைப்பினருக்கும், போலீஸாருக்கும் இடையே துப்பாக்கிச் சூடு நடைபெற்றது.

அதில், பயங்கரவாத அமைப்பின் தலைவா்களுள் ஒருவரான மகாலிங்கம், சத்தீஸ்கா் மாநிலத்தைச் சோ்ந்த ஒருவா் உள்பட 5 பேரை போலீஸாா் கைது செய்தனா். இந்த சம்பவங்களை அடுத்து, தேனி மாவட்டம் மேற்குத் தொடா்ச்சி மலைப் பகுதியில் பயங்கரவாத அமைப்பினரின் நடமாட்டம் தொடா்ந்து கண்காணிக்கப்பட்டு வருகிறது.

இந்நிலையில், முருகமலை வனப் பகுதியில் ஆயுதப் பயிற்சியில் ஈடுபட்டிருந்தபோது கைது செய்யப்பட்ட பயங்கரவாத அமைப்பைச் சோ்ந்தவா்களில் ஒருவரான, பெரியகுளம் அருகே இ.புதுக்கோட்டையைச் சோ்ந்த வேல்முருகன் (32) என்பவரை, சில நாள்களுக்கு முன் கேரள மாநிலம் பனசூரா வனப் பகுதியில் நக்ஸல் தேடுதல் வேட்டையிலிருந்த அம்மாநில போலீஸாா் சுட்டுக் கொன்றனா்.

காவல் துறை அதிா்ச்சி

தமிழக போலீஸாரிடம் ஒப்படைக்கப்பட்ட வேல்முருகனின் சடலம், பொள்ளாச்சியிலிருந்து ஆம்புலன்ஸ் மூலம் அவரது சொந்த ஊரான பெரியகுளத்துக்கு கொண்டு வரப்பட்டது. பெரியகுளத்தில் நவம்பா் 5-ஆம் தேதி அதிகாலை நடைபெற்ற வேல்முருகனின் இறுதிச் சடங்கில், தமிழகத்தின் பல்வேறு மாவட்டங்கள் மற்றும் வெளி மாநிலங்களிலிருந்து அவா் சாா்ந்திருந்த அமைப்பைச் சோ்ந்த 100-க்கும் மேற்பட்டோா் கொடிகளுடன் கலந்துகொண்டனா்.

வேல்முருகனின் உடலை அடக்கம் செய்தபோது வீரவணக்கம் செலுத்திய இவா்கள், கேரளம் மற்றும் மத்திய அரசுக்கு எதிராக முழக்கம் எழுப்பியது போலீஸாரை அதிா்ச்சியடையச் செய்தது. உடல் தகனம் முடிந்ததும் அவா்கள் கூட்டத்தில் கலந்து மறைந்ததும் போலீஸாருக்கு மேலும் அதிா்ச்சியை ஏற்படுத்தியது.

தீவிர கண்காணிப்பு

இந்தச் சம்பவங்களையடுத்து, மேற்குத் தொடா்ச்சி மலை வனப்பகுதி மற்றும் மலை கிராமங்களில் பயங்கரவாத அமைப்பினா் ஊடுருவல் உள்ளதாக போலீஸாருக்கு சந்தேகம் எழுந்துள்ளது. ஆண்டிபட்டி வட்டாரம் வருஷநாடு, போடி மற்றும் கூடலூா் மலை பகுதியில் வசிக்கும் பழங்குடியினா் மற்றும் வருஷநாடு மலை பகுதியில் வனத் துறையினரின் கெடுபிடிகளுக்கு ஆளாகியுள்ள பாரம்பரிய வனவாசிகளை குறிவைத்து பயங்கரவாத அமைப்பினா் பிரசாரம் செய்யவும், அங்கு பதுங்கியிருந்து ஆயுதப் பயிற்சி மேற்கொள்ளவும் திட்டமிட்டிருப்பதாக, காவல் துறையினருக்கு தகவல் கிடைத்துள்ளதாகக் கூறப்படுகிறது.

இதையடுத்து, மேற்குத் தொடா்ச்சி மலை வனப்பகுதி மற்றும் மலை கிராமங்களில் காவல் துறை, வனத் துறை மற்றும் மாவட்ட நிா்வாகத்தின் கண்காணிப்பு தீவிரப்படுத்தப்பட்டுள்ளது.

காவல் துறை சாா்பில் மலை கிராம மக்கள் மற்றும் பழங்குடியினருக்கு விழிப்புணா்வு ஏற்படுத்தப்பட்டும், பல்வேறு நலத்திட்ட உதவிகள் வழங்கப்பட்டும், அடிப்படை வசதிகள் செய்து தரப்பட்டும் வருகிறது.

மலை கிராம மக்கள் மற்றும் பழங்குடியினருக்கு அரசு நல உதவிகள் மற்றும் சலுகைகள் சென்றடைவதை உறுதி செய்யவும், அவா்களது வாழ்வாதாரத்தை மேம்படுத்தவும், மாவட்ட அரசுத் துறை அலுவலகங்களை அவா்கள் எளிதில் தொடா்பு கொள்வதற்கும் மாவட்ட நிா்வாகம் சாா்பில் நடவடிக்கை எடுக்கப்பட்டு வருகிறது. மலை கிராம மக்கள் மற்றும் பழங்குடியினா் குழுக்கள் அமைத்து, பயங்கரவாதிகள் நடமாட்டத்தை காவல் துறையினா் மற்றும் வனத் துறையினா் கண்காணித்து வருகின்றனா்.