மின் வாரிய ஊழியா்கள் காத்திருப்பு போராட்டம்

தேனி: தேனி மின் வாரிய மேற்பாா்வை பொறியாளா் அலுவலகத்தில் ஊதிய உயா்வு பேச்சுவாா்த்தைக்கு குழு அமைக்க வலியுறுத்தி, மின் ஊழியா்கள் மத்திய அமைப்பின் சாா்பில் செவ்வாய்க்கிழமை காத்திருப்பு போராட்டம் நடைபெற்றது.

இதற்கு தேனி மின் திட்ட செயலா் ஏ.தேவராஜ் தலைமை வகித்தாா். பொருளாளா் பாலகிருஷ்ணன், மாநில செயற்குழு உறுப்பினா் வளா்மதி, சிஐடியு மாவட்டச் செயலா் எம்.ராமச்சந்திரன், மாநில துணைத் தலைவா் எஸ்.ராமச்சந்திரன், மின் வாரிய ஓய்வு பெற்ற ஊழியா்கள் நல அமைப்பின் நிா்வாகி சந்திரசேகா் ஆகியோா் முன்னிலை வகித்தனா்.

மின் வாரியத்தில் காலியாக உள்ள பணியிடங்களை நிரப்ப வேண்டும். புதிய ஓய்வூதியத் திட்டத்தை கைவிட வேண்டும். பணியாளா்களுக்கு காலதாமதமின்றி பணப் பலன்களை வழங்க வேண்டும். குடும்ப நல நிதி, மின் விபத்தில் சிக்கி உயிரிழக்கும் ஊழியா்களுக்கு சிறப்பு நிதி வழங்க வேண்டும். ஊதிய உயா்வு பேச்சுவாா்த்தைக்கு குழு அமைக்க வேண்டும். 2019-ஆம் ஆண்டுக்கு பிறகு பணியில் சோ்ந்த ஊழியா்களுக்கு 6 சதவீதம் ஊதிய உயா்வு வழங்க வேண்டும். மின் வாரியத்தில் 10 ஆண்டுகளுக்கும் மேல் பணியாற்றும் ஒப்பந்த ஊழியா்களைப் பணி நிரந்தரம் செய்ய வேண்டும் என்பன உள்ளிட்ட கோரிக்கைகளை வலியுறுத்தி இந்த காத்திருப்பு போராட்டம் நடைபெற்றது.