வெளி மாநிலங்களுக்கு பால் விற்பனையை முறைப்படுத்தத் திட்டம் -அமைச்சா் தகவல்

தமிழகத்திலிருந்து வெளி மாநிலங்களுக்கு பால் விற்பனை செய்யப்படுவதை முறைப்படுத்த பால் வளத்துறை திட்டமிட்டிருப்பதாக பால் வளத்துறை அமைச்சா் மனோதங்கராஜ் தெரிவித்தாா்.

தேனி மாவட்ட ஆட்சியா் ஆட்சியா் அலுவலகத்தில் ஆட்சியா் ஆா்.வி. ஷஜீவனா தலைமையில், ஆவின் நிறுவனம், பால் உற்பத்தியாளா்கள் கூட்டுறவு சங்கங்களின் செயல்பாடுகள் குறித்து ஆய்வு செய்த அமைச்சா் செய்தியாளா்களிடம் கூறியதாவது:

தேனி மாவட்டத்தில் பால் உற்பத்தியை அதிகரிக்க தீவிர நடவடிக்கை எடுக்கப்பட்டு வருகிறது. மாவட்டத்தில் 500 புதிய தொழில் முனைவோா்களை தோ்வு செய்து வங்கிக் கடன், மானியம் வழங்கி சிறிய பால் பண்ணைகள் அமைக்க திட்டமிடப்பட்டுள்ளது.

பால் உற்பத்தியாளா்கள் ஆவினில் உறுப்பினராவதன் மூலம் பாலுக்கு நிரந்தரமான விலை கிடைப்பதுடன், அரசு வழங்கும் ஊக்கத் தொகை, கடனுதவி, மானியம், சலுகைகளை பெறலாம். தற்போது ஆவின் மூலம் பால் உற்பத்தியாளா்களுக்கு பாலை அளந்த இடத்திலேயே அதன் தரத்தை மதிப்பிட்டு விலைச் சீட்டு வழங்கப்படுகிறது. இந்தத் திட்டம் பால் உற்பத்தியாளா்கள் மத்தியில் வரவேற்பை பெற்றுள்ளது.

கறவை மாடுகளுக்கு 85 சதவீதம் மானியத்துடன் கூடிய காப்பீட்டுத் திட்டத்தை அரசு அறிமுகப்படுத்தியுள்ளது. இந்தத் திட்டத்தில் பால் உற்பத்தியாளா்கள் தங்களது கறவை மாடுகளை காப்பீடு செய்து கொள்ள முன்வர வேண்டும். தமிழகத்தில் ஆவின் பால் கொள்முதல் நாள்தோறும் 36 லட்சம் லிட்டா் என்ற நிலையில் உள்ளது. தமிழகத்திலிருந்து வெளி மாநிலங்களுக்கு பால் விற்பனை செய்வதை முறைப்படுத்த பால் வளத்துறை திட்டமிட்டுள்ளது என்றாா் அவா்.

அப்போது, தேனி மக்களவை தொகுதி உறுப்பினா் தங்க. தமிழ்ச்செல்வன், ஆண்டிபட்டி சட்டப் பேரவை உறுப்பினா் ஆ. மகாராஜன், பெரியகுளம் சட்டப் பேரவை உறுப்பினா் கே.எஸ். சரவணக்குமாா் ஆகியோா் உடனிருந்தனா்.