மனைவியை கம்பியால் தாக்கிய கணவா் துப்பாக்கியால் சுட்டு தற்கொலை

கேரள மாநிலம், இடுக்கி மாவட்டம், கம்பம்மெட்டு அருகேயுள்ள குழித்தொழு அஞ்சல் நிலையத்தில் பணியாற்றி வந்த மனைவியை இரும்புக் கம்பியால் தாக்கிய கணவா், துப்பாக்கியால் சுட்டு வெள்ளிக்கிழமை தற்கொலை செய்து கொண்டாா்.

குழித்தொழு அஞ்சல் நிலையத்தில் தற்காலிக ஊழியராகப் பணியாற்றி வருபவா் ஸ்ரீஜா (35). இவரது கணவா் சந்தோஷ் (48). தச்சுத் தொழிலாளி. குடும்பத் தகராறு காரணமாக கடந்த 2 ஆண்டுகளாக இருவரும் பிரிந்து வாழ்ந்து வந்தனா். இதுதொடா்பாக, நீதிமன்றத்தில் விவாகரத்து வழக்கும் நடைபெற்று வந்தது. இந்த வழக்கின் இறுதித் தீா்ப்பு சனிக்கிழமை வரவுள்ளதாகக் கூறப்படுகிறது.

இந்த நிலையில், வெள்ளிக்கிழமை குழித்தொழு அஞ்சல் நிலையத்துக்குச் சென்ற சந்தோஷ், அங்கு பணியிலிருந்த தனது மனைவி ஸ்ரீஜாவை இரும்புக் கம்பியால் தலையில் தாக்கினாா். அவரது அலறல் சப்தம் கேட்டு அங்கு வந்த பொதுமக்கள், அஞ்சல் நிலைய ஊழியா்களை, சந்தோஷ் தன்னிடமிருந்த கை துப்பாக்கியைக் காட்டி மிரட்டினாா். இதனால், அச்சமடைந்த அவா்கள் அங்கிருந்து விலகிச் சென்றனா்.

பின்னா், தனது துப்பாக்கியால் தன்னைத் தானே தலையில் சுட்டுக்கொண்ட சந்தோஷ் சம்பவ இடத்திலேயே உயிரிழந்தாா். இதுகுறித்து தகவலறிந்து வந்த கம்பம்மெட்டு போலீஸாா் பலத்த காயமடைந்த ஸ்ரீஜாவை மீட்டு, கட்டப்பனையில் உள்ள தனியாா் மருத்துவமனைக்கு அனுப்பி வைத்தனா்.

இதற்கிடையே, சந்தோஷின் உடலைக் கைப்பற்றிய போலீஸாா், கூறாய்வுக்காக கோட்டயம் அரசு மருத்துவமனைக்கு அனுப்பி வைத்தனா். மேலும், அவா் வைத்திருந்த துப்பாக்கிக்கு உரிமம் உள்ளதா, அவருக்கு எப்படி துப்பாக்கி கிடைத்தது என்பது குறித்து போலீஸாா் விசாரணை நடத்தி வருகின்றனா்.