சாத்தூர் அருகே அரசு உயர்நிலைப் பள்ளியில் சேதமடைந்த மேல்நிலை குடிநீர் தொட்டியை சீரமைக்க வலியுறுத்தல்

சாத்தூர் அருகே அரசு உயர்நிலைப் பள்ளி வளாகத்தில் உள்ள மேல்நிலை குடிநீர்த் தொட்டியை சீரமைக்க வேண்டும் என பொதுமக்கள் கோரிக்கை விடுத்துள்ளனர்.
முத்தாண்டியாபுரத்தில் அரசு உயர்நிலை மற்றும் தொடக்கப்பள்ளிகள் இயங்கி வருகின்றன. இங்கு அப்பகுதியைச் சேர்ந்த 250-க்கும் மேற்பட்ட மாணவ, மாணவிகள் படிக்கின்றனர். இப்பள்ளி வளாகத்தில் பொதுமக்களும், பள்ளி மாணவர்களும் பயன்படும் வகையில் 15 ஆண்டுகளுக்கு முன்பு மேல்நிலை குடிநீர் தொட்டி அமைக்கப்பட்டது. இத்தொட்டி தற்போது சேதமடைந்து இடியும் நிலையில் உள்ளது. மேலும் இந்த கிராமத்தில் குடிநீர் தட்டுப்பாடு அதிகமாக உள்ளதால், வரும் தண்ணீரை இந்த மேல்நிலை குடிநீர் தொட்டியில் தான் சேமிக்க வேண்டியுள்ளது.
இதனிடையே இந்த குடிநீர் தொட்டியின் அருகில் தான் பள்ளி மாணவ, மாணவிகள் ஆபத்தை உணராமல் விளையாடுகின்றனர். எனவே இந்த குடிநீர் தொட்டி இடிந்து விழுந்து விபத்து ஏற்படும் முன் அதை அகற்றி விட்டு, வேறு இடத்தில் குடிநீர் தொட்டி கட்ட வேண்டும் என அப்பகுதி மக்கள் கோரிக்கை விடுத்துள்ளனர்.
இது தொடர்பாக பொதுமக்களும், பள்ளி ஆசிரியர்களும் சம்பந்தப்பட்ட அதிகாரிகளிடம் கோரிக்கை விடுத்தும் இதுவரை எவ்வித நடவடிக்கையும் எடுக்கப்பட வில்லை என அவர்கள் புகார் தெரிவித்துள்ளனர். எனவே இந்த குடிநீர் தொட்டியை அகற்ற அதிகாரிகள் விரைந்து நடவடிக்கை எடுக்க வேண்டும் என்று இப்குதியினர் கோரிக்கை விடுத்துள்ளனர்.
இதுகுறித்து முத்தாண்டியாபுரம் பொதுமக்கள் கூறும் போது, இந்த மேல்நிலை குடிநீர் தொட்டியை சீரமைக்க வேண்டும். 
அல்லது அதை அகற்றி விட்டு வேறு இடத்தில் குடிநீர் தொட்டி அமைக்க வேண்டும். இதுபற்றி வெம்பக்கோட்டை ஊராட்சி நிர்வாகத்திடம் மனு கொடுத்தும் எவ்வித நடவடிக்கையும் எடுக்கவில்லை என்றனர்.