பட்டாசு ஆலை மேலாளர் கொலை: கிணற்றில் இருந்து சடலம் மீட்பு: அஸாம் தொழிலாளர்கள் தப்பி ஓட்டம்

சிவகாசி அருகே வியாழக்கிழமை பட்டாசு ஆலை மேலாளரை கிணற்றில் தள்ளி கொலை செய்துவிட்டு தப்பிய அஸாம் மாநில தொழிலாளர்களை போலீஸார் தேடுகின்றனர்.
    சிவகாசி வட்டம் மம்சாபுரம் அருகே பள்ளபட்டியில் உள்ள பட்டாசு ஆலையில்,  ரெங்கசமுத்திரபட்டியைச் சேர்ந்த செல்லையா மகன் செல்வராஜ் என்ற செல்வம் (35) மேலாளராகப் பணிபுரிந்து வந்தார்.அந்த ஆலையில் அஸாம் மாநிலத்தைச் சேர்ந்த உசேன் அலி(49) மற்றும் அவரது உறவினர்கள் என மூன்று குடும்பங்கள் தொழிலாளர்களாக வேலை செய்து வருகின்றனர்.  
  இந்நிலையில் இந்த மூன்று குடும்பங்களுக்கிடையே கடந்த திங்கள்கிழமை தகராறு ஏற்பட்டதாம். இதையடுத்து ஆலை மேலாளர் செல்வராஜ் அவர்களை  சமாதானப்படுத்திள்ளார். இதனால் உசேன் அலி குடும்பத்தினருக்கும் செல்வராஜ்-க்கும் இடையே பகை ஏற்பட்டதாக கூறப்படுகிறது.  இந்நிலையில், வியாழக்கிழமை உசேன் அலி மற்றும் அவரது உறவினர்கள் சிலர் செல்வராஜூவை தாக்கி ஆலையின் எதிர்புறம் உள்ள கிணற்றில் தள்ளிவிட்டுவிட்டு தப்பியோடிவிட்டார்களாம்.
இச்சம்பவம் குறித்து தகவலறிந்த மாரனேரி போலீஸார்,  கிணற்றில் மிதந்த  செல்வராஜின் சடத்தை மீட்டு பிரேத பரிசோதனைக்கு அனுப்பினர். மேலும் இச்சம்பவம் குறித்து வழக்குப்பதிந்து தப்பியோடிய நபர்களைத் தேடி வருகின்றனர்.