மின்சாரம் பாய்ந்து தொழிலாளி சாவு

சாத்தூர் அருகே வியாழக்கிழமை மின்சாரம் பாய்ந்து தொழிலாளி உயிரிழந்தார். 
   விருதுநகர் மாவட்டம் சாத்தூர் அருகே சடையம்பட்டியை சேர்ந்தவர் செல்வம்(40). கூலி தொழிலாளி. இவர் இப் பகுதியில் உள்ள காட்டுப் பகுதிக்கு வியாழக்கிழமை மாலை சென்றுள்ளார். 
அப்போது அப் பகுதியில் விவசாயத்திற்காக போடப்பட்டிருந்த மின்வேலி, செல்வம் மீது உரசியதில் மின்சாரம் பாய்ந்து சம்பவ இடத்திலேயே உயிரிழந்தார். இது குறித்து சாத்தூர் தாலுகா போலீஸார் வழக்குப் பதிவு செய்து விசாரிக்கின்றனர்.
இதே போன்று வெம்பக்கோட்டையைச் சேர்ந்த கல்லூரி மாணவர் கொத்தாளமுத்து(18). அதே பகுதியில் உள்ள தனியார் கல்லூரியில் படித்து வருகிறார். 
வியாழக்கிழமை மாலையில் வெம்பக்கோட்டை பகுதியில் விளையாடி கொண்டிருக்கும் போது, பந்து அருகில் உள்ள கட்டடத்தின் மேல் விழுந்துள்ளது. இதை எடுப்பதற்காக கொத்தாளமுத்து அந்த மாடி பகுதிக்கு சென்றுள்ளார். 
அப்போது கட்டடத்தின் மேல் சென்ற மின்கம்பி கொத்தாளமுத்து மீது உரசியதில் பலத்த காயமடைந்தார். 
அவரை மீட்டு சிவகாசி அரசு மருத்துவமனையில் சிகிச்சைக்காக அனுப்பி வைத்தனர். 
இது குறித்து வெம்பக்கோட்டை போலீஸார் விசாரணை நடத்தி வருகின்றனர்.