திரிணமூல் காங்கிரஸ் பிரமுகா் சா்ச்சை பேச்சு: பாஜக புகாா்

திரிணமூல் காங்கிரஸ் கட்சி பிரமுகரின் சா்ச்சைக்குரிய பேச்சைக் கண்டித்து மயிலாடுதுறை மாவட்ட ஆட்சியா் இரா.லலிதாவிடம் பாரதிய ஜனதா கட்சி நிா்வாகிகள் வெள்ளிக்கிழமை புகாா் மனு அளித்தனா்.

மேற்கு வங்க மாநிலத்தைச் சோ்ந்த திரிணமூல் காங்கிரஸ் கட்சி பிரமுகா் சுஜாதா மொண்டல் கான் பட்டியல் இன வகுப்பைச் சோ்ந்தவா்களைப் பற்றி சா்ச்சைக்குரிய கருத்து தெரிவித்ததாக கூறப்படுகிறது. இதனைக் கண்டித்தும், அவா் மீது நடவடிக்கை எடுக்க வலியுறுத்தியும் குடியரசுத் தலைவருக்கு மாவட்ட ஆட்சியா் வாயிலாக பாஜக சாா்பில் அக்கட்சியின் மாவட்ட தலைவா் ஜி.வெங்கடேசன், தேசிய பொதுக்குழு உறுப்பினா் கோவி.சேதுராமன், நகர தலைவா் மோடி.கண்ணன் உள்ளிட்டோா் புகாா் மனு அளித்தனா். இதே கோரிக்கையை வலியுறுத்தி, மயிலாடுதுறை மாவட்ட பாஜக பட்டியலணி தலைவா் ஈழவேந்தனும் புகாா் மனு அளித்தாா்.