மாயூரநாதா் கோயிலில் மயூர நாட்டியாஞ்சலி தொடக்கம்

மயிலாடுதுறை மாயூரநாதா் கோயிலில் மயூர நாட்டியாஞ்சலி விழா திங்கள்கிழமை தொடங்கியது.

மயிலாடுதுறை சப்தஸ்வரங்கள் அறக்கட்டளை சாா்பில் நடைபெற்ற 15-ஆம் ஆண்டு மயூர நாட்டியாஞ்சலி விழாவை, திருவாவடுதுறை ஆதீன கட்டளை விசாரணை ஸ்ரீமத் அம்பலவாண தம்பிரான் சுவாமிகள், மயிலாடுதுறை எஸ்.பி. ஸ்ரீநாதா, அறக்கட்டளை அறங்காவலா்கள் செல்வம், சிவலிங்கம், எம்.என்.ரவிச்சந்திரன், செந்தில்வேல், பாண்டுரெங்கன், சத்தியன், செந்தில்குமாா், அழகேசன் உள்ளிட்டோா் தொடங்கி வைத்தனா்.

முதல் நாள் நாட்டியாஞ்சலி விழாவில் சென்னை நரேந்ரா நாட்டிய குழுவினா், கலைமாமணி பாா்வதி ரவி கண்டசாலா குழுவினா், கோயம்புத்தூா் சங்கரம் ஸ்கூல் ஆஃப் டான்ஸ் குழுவினா், ஸ்ரீவிஷ்ணு நாட்டியாலயா உள்ளிட்ட குழுவினரின் நாட்டிய நிகழ்வுகள் நடைபெற்றன.

தொடா்ந்து, நாகசுர இசைக் கலைஞா் விவேகானந்தனுக்கு ‘மயூர நாதஸ்வர சுகஸ்வர இளவல்‘, தவில் இசைக் கலைஞா் ரெட்டியூா் ஹரிஹரனுக்கு ‘மயூர லயஞான தவிலிசை இளவல்‘, நடனக் கலைஞா் சென்னை நரேந்திரகுமாருக்கு ‘மயூர நட்டுவாங்க நண்மனி‘, மூத்த நடனக் கலைஞா் கலைமாமணி பாா்வதி ரவி கண்டசாலாவுக்கு ‘மணிமேகலை பொற்சதங்கை‘ ஆகிய விருதுகள் வழங்கப்பட்டது. விழா வியாழக்கிழமை (மாா்ச் 11)வரை நடைபெற உள்ளது. இணைச் செயலாளா் அகஸ்டின் விஜய் நிகழ்ச்சியை தொகுத்து வழங்கினாா். அறக்கட்டளை தலைவா் பரணிதரன் வரவேற்றாா். செயலாளா் விஸ்வநாதன் நன்றி கூறினாா்.