போலீஸார் இன்றுமுதல் சைக்கிளில் ரோந்துப் பணி

புதுச்சேரியில் ரோந்துக் காவலர்களுக்கான சைக்கிள் வழங்கும் திட்டத்தை முதல்வர் வே. நாராயணசாமி ஞாயிற்றுக்கிழமை தொடங்கி வைத்த நிலையில், காரைக்கால் போலீஸாருக்கான சைக்கிள் திங்கள்கிழமை வந்து சேர்ந்தது. செவ்வாய்க்கிழமை (பிப். 6) முதல் சைக்கிள் ரோந்து தொடங்கும் என காவல்துறை அலுவலர் தெரிவித்தார்.
காவல்நிலையங்கள் மூலம் நிலைய சரகத்துக்குள்பட்ட பகுதியில் நடைபெறும் ரோந்துப் பணியில் ஆண் காவலர்கள் மட்டுமே ஈடுபட்டு வந்தனர். இவர்கள் மோட்டார் சைக்கிள், ஜீப் மூலம் ரோந்துப் பணி மேற்கொண்டு வருகின்றனர். புதுச்சேரியில் கடந்த டிசம்பர் மாதம் காவல்நிலையங்களை ஆய்வு செய்த துணை நிலை ஆளுநர் கிரண்பேடி, பெண்களும் ரோந்துக் காவலர்களாக நியமிக்கப்படவேண்டும் என அறிவுறுத்தினார்.
இதைத் தொடர்ந்து பெண் காவலர்களும் ரோந்துப் பணியில் ஈடுபடத் தொடங்கியுள்ளனர். ரோந்துப் பணியில் ஈடுபடும் காவலர்கள் சைக்கிளில் செல்ல வேண்டும் என அறிவுறுத்தப்பட்ட நிலையில், புதுச்சேரி காவலர்களுக்கு ஞாயிற்றுக்கிழமை சைக்கிள் வழங்கப்பட்டது.
காரைக்கால் பகுதியில் உள்ள காரைக்கால் நகரக் காவல்நிலையம், நிரவி, திருப்பட்டினம், கோட்டுச்சேரி, நெடுங்காடு, திருநள்ளாறு மற்றும் அம்பகரத்தூர் புறக்காவல் நிலையத்தைச் சேர்ந்த ரோந்துக் காவலர்களுக்கான சைக்கிள் புதுச்சேரியிலிருந்து திங்கள்கிழமை காரைக்கால் கொண்டுவரப்பட்டது.
இதுகுறித்து காரைக்கால் தெற்கு மண்டல காவல் கண்காணிப்பாளர் வம்சீதரரெட்டி திங்கள்கிழமை கூறியது:
ஒரு காவல்நிலையத்துக்கு 4 சைக்கிள் வீதம் 24 சைக்கிள்கள் வழங்கப்படவுள்ளன. புறக்காவல் நிலையத்துக்கு 2 சைக்கிள் வழங்கப்படவுள்ளது. ஒரு சைக்கிள் மாற்றுக்காக வைக்கப்படும். இவை திங்கள்கிழமை இரவு அந்தந்த பகுதி  காவல்நிலையத்தினருக்கு வழங்கப்படும். இவர்கள் செவ்வாய்க்கிழமை முதல் சைக்கிளில் ரோந்துப் பணியை மேற்கொள்வர்.
கிராமப்புறங்களில் உள்ள சாலைகள் குறுகிய நிலையில்  இருக்கும், சைக்கிளில் சென்றால் ஒவ்வொரு பகுதியையும் பொறுமையாக கவனித்துச் செல்ல முடியும், வீதியில் சிலரிடம் நின்று பேசமுடியும் என்பதால் சைக்கிள் ரோந்து வசதி செய்யப்பட்டுள்ளது. தேவைப்படும் பகுதிகளுக்கு மோட்டார் சைக்கிள், ஜீப் பயன்படுத்தப்படும் என்றார்.