பள்ளியில் அறிவியல் கண்காட்சி

காரைக்கால் எஸ்.ஆர்.வி.எஸ். நேஷனல் மேல்நிலைப் பள்ளியில் மழலையர்களுக்கான அறிவியல் கண்காட்சி புதன்கிழமை நடைபெற்றது.
பள்ளி வளாகத்தில் கண்காட்சி அரங்கை பள்ளித் தாளாளர் கே.செல்லையன் தொடங்கிவைத்தார். பள்ளி முதல்வர் எஸ்.கந்தசாமி, துணை முதல்வர் தே.சுமதி, தலைமையாசிரியர் ஜி.ராஜேந்திரன் ஆகியோர் கண்காட்சியில் பங்கேற்ற சிறார்களைப் பாராட்டிப் பேசினர். சுமார் 100 சிறார்கள் கண்காட்சியில் பங்கேற்று, பள்ளி மாதிரி, பழ வகைகள், நீர் வாழ் விலங்குகள், அதன் இருப்பிடங்கள், சாலை விதிகள், போக்குவரத்து சாதனங்கள், பூங்கா, சத்தான உணவு வகைகள் என பல்வேறு படைப்புகளை காட்சிப் பொருளாக வைத்திருந்தனர். நடுவர் குழுவினரிடம் அதற்கான விளக்கத்தை சிறார்கள் விளக்கினர். சிறந்த படைப்புகள் பரிசுக்குத் தேர்வு செய்யப்பட்டன. 1 முதல் 5- ஆம் வகுப்பு வரையிலான மாணவர்கள்  கண்காட்சியை பிற வகுப்பு மாணவ, மாணவியரும், பெற்றோர்களும் பார்த்து மகிழ்ந்தனர். ஏற்பாடுகளை பள்ளி அறிவியல் ஆசிரியர்கள், வகுப்பாசிரியர்கள் செய்திருந்தனர்.