இந்திய கம்யூனிஸ்ட் கட்சியினர் ஆர்ப்பாட்டம்

சாலைகள் சீரமைப்பு செய்தல், குப்பைகளுக்கான வரியை ரத்து செய்தல் உள்ளிட்ட கோரிக்கைகளை வலியுறுத்தி, காரைக்காலில் இந்திய கம்யூனிஸ்ட் கட்சியினர் புதன்கிழமை ஆர்ப்பாட்டம் நடத்தினர்.
காரைக்கால்  புதிய பேருந்து நிலையம் அருகே பழைய ரயிலடியில் நடைபெற்ற ஆர்ப்பாட்டத்துக்கு கட்சியின் பிரதேச செயலர் ப. மதியழகன் தலைமை வகித்தார். சிறப்பு அழைப்பாளராக கட்சியின் தேசியக் குழு உறுப்பினர் அ. ராமமூர்த்தி கலந்துகொண்டு பேசினார்.
காரைக்கால் மாவட்டம் முழுவதும் சிதிலமடைந்த நிலையில் உள்ள சாலைகளை உடனடியாக போர்க்கால அடிப்படையில் சீரமைக்க வேண்டும். வீட்டு வரி உயர்வை ரத்து செய்ய வேண்டும். குடிநீர், மின் கட்டண உயர்வை குறைக்க வேண்டும். குப்பைக்கு விதிக்கப்பட்டிருக்கும் வரியை ரத்து செய்ய வேண்டும். தனியார் கல்வி நிறுவனங்களின் கல்விக் கட்டணங்களை முறைப்படுத்த வேண்டும் உள்ளிட்ட பல்வேறு கோரிக்கைகள் ஆர்ப்பாட்டத்தில் வலியுறுத்தப்பட்டன. கட்சி நிர்வாகிகள் என். பிச்சையன், ஜி. கலியமூர்த்தி, ஜி. புண்ணியமூர்த்தி மற்றும் பெண்கள் உள்ளிட்ட கட்சியினர் பலர் கலந்துகொண்டனர்.