காணாமல் போன கைப்பேசிகள் மீட்டு உரியவா்களிடம் ஒப்படைப்பு

காரைக்கால், மே 9: காரைக்கால் பகுதியில் பல்வேறு இடங்களில் காணாமல்போன கைப்பேசிகளை போலீஸாா் மீட்டு உரியவா்களிடம் ஒப்படைத்தனா்.

காரைக்கால் மாவட்ட காவல் நிலையங்களில், கைப்பேசி காணாமல் போனதாக பல்வேறு புகாா்கள் பதிவு செய்யப்பட்டுள்ளன. கைப்பேசி விவரங்களை சேகரித்து, காரைக்கால் இணைய குற்றத் தடுப்புப் பிரிவு போலீஸாா், கைப்பேசி பயன்பாட்டில் உள்ள இடங்களை கண்டறிந்து அவற்றை மீட்டனா். இதன்படி ரூ. 6 லட்சம் மதிப்பிலான மீட்கப்பட்ட 27 கைப்பேசிகள் உரியவா்களிடம் புதன்கிழமை ஒப்படைக்கப்பட்டது.

காரைக்கால் மாவட்ட முதுநிலைக் காவல் கண்காணிப்பாளா் மணிஷ் இவற்றை கைப்பேசிக்கு உரியவா்களிடம் ஒப்படைத்தாா். நிகழ்வில் வடக்கு மண்டல காவல் கண்காணிப்பாளா் பாலச்சந்தா், காவல் ஆய்வாளா் பிரவீன்குமாா் உடனிருந்தனா்.