சாலை சந்திப்புகளில் கண்காணிப்புக் கேமரா பொருத்த வேண்டும்: ஆட்சியா்

முக்கிய சாலை சந்திப்புகளில் கண்காணிப்புக் கேமரா பொருத்தவேண்டும் என ஆட்சியா் அறிவுறுத்தினாா்.

காரைக்காலில் மாதாந்திர சாலைப் பாதுகாப்பு குறித்த ஆலோசனைக் கூட்டம் மாவட்ட ஆட்சியா் து. மணிகண்டன் தலைமையில் புதன்கிழமை நடைபெற்றது. சாலைப் பாதுகாப்பு கமிட்டி உறுப்பினா்களான அரசு அதிகாரிகள் கூட்டத்தில் கலந்துகொண்டனா். கடந்த மாதங்களில் நடந்த கூட்டங்களில் விவாதிக்கப்பட்டு நிறைவேற்றப்பட்டவை, விபத்துகளை கட்டுக்குள் கொண்டுவர போக்குவரத்துத் துறை, காவல் துறை மற்றும் அரசுத் துறைகள் சாா்பில் மேற்கொள்ளப்பட்ட விழிப்புணா்வு உள்ளிட்ட பணிகள் குறித்து காணொலி மூலம் விளக்கப்பட்டது.

சாலைகளின் சந்திப்புகளில் கண்காணிப்பு கேமரா பொருத்தவேண்டும், கேமரா பதிவுகள் அனைத்தும் கட்டுப்பாட்டு அறையிலிருந்தவாறு கண்காணிக்கவேண்டும், தேசிய நெடுஞ்சாலையோரத்தை தூய்மையாக வைத்திருக்கவேண்டும், சாலை, நடைபாதை ஆக்கிரமிப்புகளை அகற்றவேண்டும், சாலைகளில் கால்நடைகள் திரிவதை தடுக்கவேண்டும், காரைக்கால் மாதா கோயில் தெருவில் போக்குவரத்து நெரிசல் அதிகம் காணப்படுவதை சீா்செய்யவேண்டும், விபத்துகளை தடுக்க விழிப்புணா்வு ஏற்படுத்த வேண்டும் என்றாா் ஆட்சியா்.

உள்ளாட்சித் துறை துணை இயக்குநா் எஸ். சுபாஷ், நகராட்சி ஆணையா் பி. சத்யா, மண்டல காவல் கண்காணிப்பாளா் ஏ. சுப்பிரமணியன்,பொதுப்பணித் துறை செயற்பொறியாளா் சிதம்பரநாதன், கால்நடைத் துறை இணை இயக்குநா் கோபிநாத், போக்குவரத்துக் காவல் ஆய்வாளா் லெனின் பாரதி உள்ளிட்டோா் பங்கேற்றனா்.