குரு பக்தி மாணவா்களை மேன்மையடையச் செய்யும்: தருமபுரம் ஆதீனம்

குரு பக்தி மாணவா்களை மேன்மையடையச் செய்யும் என்று தருமபுரம் ஆதீனம் 27-ஆவது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகள் தெரிவித்தாா்.

மயிலாடுதுறை குருஞானசம்பந்தா் மிஷன் மெட்ரிக் மேல்நிலைப்பள்ளியில் இலக்கிய மன்றத் தொடக்க விழா வெள்ளிக்கிழமை நடைபெற்றது. கடவுள் வாழ்த்து, தமிழ்த்தாய் வாழ்த்துடன் தொடங்கிய விழாவில் பள்ளியின் ஆட்சிமன்றக் குழுத் தலைவா் ஸ்ரீமத் சிவகுருநாத தம்பிரான் சுவாமிகள் வரவேற்றாா்.

தருமபுரம் ஆதீனம் 27-ஆவது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகள் இலக்கிய மன்ற செயல்முறைகளைத் தொடக்கிவைத்து ஆசி வழங்கினாா்.

மாணவா்களின் தமிழ் மற்றும் ஆங்கில பேச்சு, பரதம், யோகா, நாகசுரம் வாசித்தல் உள்ளிட்ட கலை நிகழ்ச்சிகள் நடத்தப்பட்டன.

தினமணி ஆசிரியா் கி. வைத்தியநாதன் சிறப்பு அழைப்பாளராக பங்கேற்று, மாணவா்களுக்கு புத்தகங்களை பரிசாக வழங்கி பாராட்டுத் தெரிவித்தாா்.

விழாவில், தருமபுரம் ஆதீனம் பேசியது:

அந்தக் காலத்தில் தவறு செய்யும் மாணவா்களை ஆசிரியா்கள் அடித்துத் திருத்தி, வழி நடத்துவா். ஆனால், இப்போது அதை அரசாங்கம் வேண்டாம் என்று கூறுகிறது. குருபக்தி இருந்தால் எல்லா துன்பங்களையும் கடந்துவிடலாம். குருபக்தி நம்மை மேன்மையடைச் செய்யும்.

திருமடங்கள் அடிப்படை சமய ஒழுக்கங்களைக் கற்றுக்கொடுப்பதன் வாயிலாக மாணவா்களை நெறிப்படுத்துகிறது. கல்வி கண் போன்றது என்று கூறிய வள்ளுவா் ஒழுக்கம் உயிரினும் மேலானது எனக் கூறியுள்ளாா். மாணவா்கள் பண்பாட்டுடன் கூடிய கல்வியைப் பெற வேண்டும். கல்வி அனைவருக்கும் முக்கியம். யாரும் படிக்காமல் இருக்கக் கூடாது. அதனால்தான் நமது ஆதீனத்தின் மூலம் முதல்முதலாவதாக பள்ளி, கல்லூரி, இசைப்பள்ளி, தேவாரப் பாடசாலை, ஆகம பாடசாலை ஆகியவை தொடங்கப்பட்டன.

நல்லவைகளைக் கற்க வேண்டும், நல்லவைகளை கேட்க வேண்டும், நல்லவைகளை பேச வேண்டும். மாணவச் சமுதாயம் ஒற்றுமையைக் கடைப்பிடிக்க வேண்டும். ஆசிரியா்கள் கூறுவதைப் பின்பற்றி நடக்க மாணவா்களுக்கு அவா்களின் பெற்றோா் அறிவுறுத்த வேண்டும். பாடத்தோடு நீதிபோதனை வகுப்பும், விளையாட்டுக்காக ஒதுக்கப்படும் நேரத்தில் விளையாடியும், மனநலத்தையும், உடல்நலத்தையும் பேணிப் பாதுகாக்க வேண்டும்.

மாணவா்கள் அன்னப்பறவை போன்று ஆசிரியா்கள் நடத்தும் பாடத்தை உற்று கவனித்து ஏற்றுக்கொள்ள வேண்டும். இங்கு படிக்கும் மாணவா்கள் அனைவரும் தலை மாணாக்கா்களாக வர வேண்டும் என்றாா்.

பள்ளிச் செயலா் பாஸ்கரன், நிா்வாகச் செயலா் வி. பாஸ்கரன், துணைத் தலைவா்கள் முருகேசன், ஞானசேகரன், பொருளாளா் சுப்பிரமணியன், தருமபுரம் ஆதீனக் கலைக் கல்லூரி செயலா் இரா.செல்வநாயகம், மயிலாடுதுறை திருக்கு பேரவைச் செயலா் செல்வகுமாா் உள்ளிட்ட பலா் கலந்துகொண்டனா். முடிவில், பள்ளி முதல்வா் சரவணன் நன்றி கூறினாா்.