கடன் கொடுத்தவர் தூக்கிட்டு தற்கொலை

திருவாரூர் மாவட்டம், மன்னார்குடியில் கடனாக கொடுத்த பணம், நகையை நண்பர்கள் திருப்பி தராததால், கடன் கொடுத்தவர் ஞாயிற்றுக்கிழமை தூக்கிட்டு தற்கொலை செய்து கொண்டார்.

மன்னார்குடி, மூர்க்க விநாயர் கோயில் தெருவைச் சேர்ந்த ராமசாமி மகன் வெங்கடேசன் (48). இவருக்கு மனைவி சுமதி, 2 மகன்கள் உள்ளனர்.

அடகுக்கடையில் கணக்கராக பணிபுரிந்து வந்த வெங்கடேசன், புதுக்கோட்டை மாவட்டம், கட்டுமாவடியைச் சேர்ந்த நண்பரான நைனாமுகமதுவுக்கு அவசரத் தேவைக்காக 7 பவுன் நகையை கொடுத்திருந்தாராம். இதேபோல், பந்தலடியில் காலணி கடை வைத்திருக்கும் முத்து என்பவருக்கு ரூ. 1.50 லட்சம் கடனாக கொடுத்திருந்தாராம்.

இந்நிலையில், தான் கொடுத்த பணத்தையும், நகையையும் திருப்பி தருமாறு இருவரிடமும் வெங்கடேசன் கேட்டு வந்தாராம். ஆனால் அவர்கள் தொடர்ந்து தாமதித்து வந்துள்ளனர்.

இதனால், சில நாள்களாக மனமுடைந்த நிலையில் இருந்து வந்த வெங்கடேசன், ஞாயிற்றுக்கிழமை லெக்கணம்பேட்டையில் இருக்கும் உறவினர் வீட்டுக்கு சென்றுள்ளார்.

அங்கு யாரும் இல்லாத நேரத்தில் மின்விசிறியில் தூக்கிட்டு தற்கொலை செய்து கொண்டார்.

தகவலறிந்த மன்னார்குடி போலீஸார், சம்பவ இடத்துக்கு சென்று வெங்கடேசனின் சடலத்தை கைப்பற்றி பிரேதப் பரிசோதனைக்கு மன்னார்குடி அரசு மருத்துவமனைக்கு அனுப்பிவைத்து, விசாரித்து வருகின்றனர்.