அனைவருக்கும் புயல் நிவாரணம் வழங்கக் கோரி நாகை மாவட்டத்தில் 4 இடங்களில் மார்க்சிஸ்ட் கம்யூ. ஆர்ப்பாட்டம்

கஜா புயலால் பாதிக்கப்பட்ட அனைவருக்கும் நிவாரணம் வழங்கக் கோரி, நாகை மாவட்டத்தில் 4 இடங்களில் மார்க்சிஸ்ட் கம்யூனிஸ்ட் கட்சியினர் புதன்கிழமை ஆர்ப்பாட்டத்தில் ஈடுபட்டனர்.
 கஜா புயலால் பாதிக்கப்பட்ட நாகை மாவட்டத்தைப் பேரிடர் பாதித்த மாவட்டமாக அறிவிக்கவேண்டும்; புயலால் பாதிக்கப்பட்டு  உயிரிழந்த கால்நடைகளுக்கு  உடனடியாக  நிவாரணம் வழங்கவேண்டும்; பாதிக்கப்பட்ட நெற்பயிர் ஏக்கருக்கு ரூ.30 ஆயிரம் இழப்பீடு வழங்கவேண்டும்; வீடுகளுக்கு ரூ.25 ஆயிரம் நிவாரணம் வழங்கவேண்டும்; பாதிக்கப்பட்ட வீடுகளுக்குப் பதிலாக கான்கிரீட் வீடுகளை போர்க்கால அடிப்படையில் கட்ட அரசாணை வெளியிடவேண்டும் என்பன உள்ளிட்ட கோரிக்கைகளை வலியுறுத்தி நாகை மாவட்டத்தில் நாகை,கீழ்வேளூர், திருக்குவளை மற்றும் வேதாரண்யம் ஆகிய 4 இடங்களில் மார்க்சிஸ்ட் கம்யூனிஸ்ட் கட்சியினர் ஆர்ப்பாட்டத்தில் ஈடுபட்டனர்.
நாகை: நாகை வட்டாட்சியர் அலுவலகம் முன்பு நடைபெற்ற ஆர்ப்பாட்டத்துக்கு  கட்சியின் நாகை ஒன்றியச் செயலாளர் பி.டி. பகு தலைமை வகித்தார். திருமருகல் ஒன்றியச் செயலாளர் எம். ஜெயபால், நாகை நகர செயலாளர் எம். பெரியசாமி, மாவட்டக் குழு உறுப்பினர்கள் பி.கே. ராஜேந்திரன்,  எம். சுப்பிரமணியன் ஆகியோர் முன்னிலை வகித்தனர். மாநிலக் குழு உறுப்பினரும், முன்னாள் எம்எல்ஏ-வுமான வி. மாரிமுத்து கோரிக்கைகளை வலியுறுத்திப் பேசினர். இதில் 400-க்கும் மேற்பட்டவர்கள் கலந்துகொண்டனர்.
கீழ்வேளூர்: கீழ்வேளூர் வட்டாட்சியர் அலுவலகம் முன்பு நடைபெற்ற ஆர்ப்பாட்டத்துக்கு கட்சியின் ஒன்றியச் செயலாளர் ஜி. ஜெயராமன் தலைமை வகித்தார். நாகை மாவட்டச் செயலாளரும், முன்னாள் எம்எல்ஏ-வுமான நாகை மாலி, மாவட்டக் குழு உறுப்பினர்கள் எம்.என். அம்பிகாபதி, எம். செல்வராஜ், எம்.என். அபுபக்கர், எம்.சாந்தி, சிஐடியு மாவட்டச் செயலாளர் சீனி.மணி ஆகியோர் கோரிக்கைகளை வலியுறுத்திப் பேசினர்.  
திருக்குவளை: திருக்குவளை வட்டாட்சியர் அலுவலகம் முன்பு நடைபெற்ற ஆர்ப்பாட்டத்துக்கு கட்சியின் மாநிலக்குழு உறுப்பினர் ஏ.வி.முருகையன் தலைமை வகித்தார். மாவட்டச் செயற்குழு உறுப்பினர் ஆர்.முத்துபெருமாள், ஒன்றிய நிர்வாகிகள் முருகையன் உள்ளிட்டோர் கோரிக்கைகளை வலியுறுத்திப் பேசினர்.
வேதாரண்யம்: வேதாரண்யம் வட்டாட்சியர் அலுவலகம் முன்பு நடைபெற்ற ஆர்ப்பாட்டத்துக்கு கட்சியின் ஒன்றியச் செயலாளர் வி. அம்பிகாபதி தலைமை வகித்தார். மாவட்டச் செயற்குழு உறுப்பினர் வி. சுப்பிரமணியன் கோரிக்கைகளை வலியுறுத்திப் பேசினார். 
இதில், ஒன்றியக் குழு உறுப்பினர்கள் பி.எஸ். பன்னீர் செல்வம், எ. வெற்றியழகன் உள்ளிட்டோர் கலந்துகொண்டனர்.