குண்டர் சட்டத்தில் இருவர் கைது

கொலை, கொள்ளை மற்றும் மதுவிற்பனையில் ஈடுபட்ட இருவரை போலீஸார் குண்டர் தடுப்புச் சட்டத்தில் புதன்கிழமை கைது செய்தனர். 
நாகை  மாவட்டம், புதுப்பட்டினம்  காவல் சரகத்துக்குள்பட்ட உமையாள்பதி குலசிங்கநல்லூர் மாரியம்மன் கோயில் தெருவைச் சேர்ந்தவர் குலோத்துங்கன்(34). கொலை, கொள்ளை வழக்குகளில் தொடர்புடைய இவர் கைது செய்யப்பட்டு   திருச்சி மத்திய  சிறையில் அடைக்கப்பட்டுள்ளார். இந்நிலையில், நாகை மாவட்டக் காவல் கண்காணிப்பாளர்  செ. விஜயகுமாரின் பரிந்துரையின்பேரில், நாகை மாவட்ட  ஆட்சியர் சீ. சுரேஷ்குமார், மு. குலோத்துங்கனை குண்டர் தடுப்புச் சட்டத்தின்கீழ் கைது செய்ய புதன்கிழமை உத்தரவிட்டார். 
சாராய வியாபாரி: நாகை மாவட்டம், மயிலாடுதுறை காவல் சரகத்துக்குள்பட்ட மன்னம்பந்தல் மொளப்பாக்கம் பகுதியைச் சேர்ந்தவர் அழகர்சாமி (46). இவர் சாராய விற்பனை மற்றும் கடத்தல் தொடர்பான வழக்கில் கைதாகி திருச்சி மத்திய சிறையில் அடைக்கப்பட்டுள்ளார். இந்நிலையில், இவரை குண்டர் தடுப்புச் சட்டத்தில் கைது செய்யக் கோரி மாவட்ட காவல் கண்காணிப்பாளர் செ. விஜயகுமாரின் பரிந்துரையின் பேரில், மாவட்ட ஆட்சியர் சீ. சுரேஷ்குமார், அழகர்சாமியை குண்டர் தடுப்புச் சட்டத்தில் கைது செய்ய புதன்கிழமை உத்தரவிட்டார்.