ஓம்சக்தி விநாயகர் கோயில் குடமுழுக்கு

நாகை மாவட்டம், குத்தாலம் வட்டம், திருமணஞ்சேரி காளிவாய்க்கால் தெருவில் உள்ள ஓம்சக்தி விநாயகர் கோயிலில் குடமுழுக்கு விழா புதன்கிழமை நடைபெற்றது.
இதையொட்டி, செவ்வாய்க்கிழமை காலை விநாயகர் அனுக்ஞை, கணபதி ஹோமத்துடன் உத்ஸவம் தொடங்கி, முதல் கால யாக சாலை பூஜை நடைபெற்றது. புதன்கிழமை இரண்டாம் கால யாக சாலை பூஜையில் பூர்ணாஹுதி மற்றும் மகா தீபாராதனை காட்டப்பட்டு, கடம் புறப்பட்டது. சிவாச்சாரியார்கள் கடங்களைச் சுமந்து கோயிலைச் சுற்றி வந்து விமானத்தை அடைந்தனர்.
வேத விற்பன்னர்கள் வேதங்கள் முழங்க குடமுழுக்கு நடைபெற்றது. உமாபதி சிவாச்சாரியார் உள்ளிட்டோர் சர்வ சாதகம் செய்து வைத்தனர். இதில், திரளான பக்தர்கள் கலந்துகொண்டனர். விழாவுக்கான ஏற்பாடுகளை காளிவாய்க்கால் தெரு கிராம நாட்டாண்மைகள் செய்திருந்தனர்.