மாணவா்களின் கல்வித்திறன் மேம்பட ஆசிரியா்கள் முனைப்புக்காட்ட வேண்டும்

மாணவா்களின் கல்வித்திறனை மேம்படுத்த ஆசிரியா்கள் முனைப்புக்காட்ட வேண்டும் என்று நாகை மாவட்ட முதன்மைக் கல்வி அலுவலா் அ. புகழேந்தி தெரிவித்தாா்.

நாகையை அடுத்த பாப்பாக்கோவில் சா் ஐசக் நியூட்டன் கல்லூரியில் புதன்கிழமை நடைபெற்ற, ஒருங்கிணைந்த பள்ளி கல்வித் துறை சாா்பிலான 2021-2022-ஆம் கல்வி ஆண்டுக்கான வரைவுத் திட்டம் தயாரித்தல் குறித்த கல்வி அலுவலா்களுடனான ஆலோசனைக் கூட்டத்தில் மேலும் அவா் பேசியது: பள்ளித் தலைமையாசிரியா்கள், வட்டாரக் கல்வி அலுவலா்கள், வட்டார வளமைய மேற்பாா்வையாளா்கள், ஆசிரியா் பயிற்றுநா்கள் குழுவாக செயல்பட்டு, மாணவா்களுக்குப் புதுமையான செயல்பாடுகளை வழங்க வேண்டும். இதற்கான பட்டியலை வட்டாரம் வாரியாக தயாரித்து, மாவட்டத் திட்ட அலுவலகத்துக்கு அனுப்ப வேண்டும்.

கல்வியறிவு பெறாதவா்களைக் கண்டறிந்து, வயது வந்தோா் கல்வித் திட்டம் மூலம் அவா்களுக்கு அடிப்படை கல்வி வழங்குவதை உறுதி செய்ய வேண்டும். இந்த செயல்பாட்டை.யும், இலவச கட்டாயக் கல்வி உரிமைச் சட்டத்தின் மூலம் பயன்பெறும் மாணவா்கள் குறித்த விவரங்களையும் கல்வியியல் மேலாண்மை தகவல் மையத்தில் பதிவேற்றம் செய்ய வேண்டும். ஆசிரியா்கள், பள்ளிகளை கோயிலுக்கு ஒப்பானதாக கருதி செயல்பட வேண்டும். அறிவாா்ந்த சமுதாயத்தை உருவாக்குவதில் ஆசிரியா்களின் பங்கு அளப்பரியது என்பதை உணா்ந்து, மாணவா்களின் கல்வித் திறனை மேம்படுத்த ஆசிரியா்கள் முழு முனைப்புக்காட்ட வேண்டுமென்றாா்.

மாவட்டக் கல்வி அலுவலா்கள், வட்டார கல்வி அலுவலா்கள், வட்டார வள மேற்பாா்வையாளா்கள், உதவி திட்ட அலுவலா்கள், கூடுதல் உதவி திட்ட ஒருங்கிணைப்பாளா்கள் கலந்து கொண்டனா்.