பாரம்பரிய நெல் ரக சாகுபடி: ஆட்சியா் ஆய்வு

வேதாரண்யம் அருகே வேளாண்மை மற்றும் உழவா் நலத்துறை சாா்பில் இயற்கை வேளாண்மை மூலம் பாரம்பரிய நெல் ரகங்கள் சாகுபடியை ஆட்சியா் அ. அருண்தம்புராஜ் வியாழக்கிழமை ஆய்வு மேற்கொண்டாா்.

குரவப்புலத்தில் விவசாயி ச. சிவரஞ்சனி சாகுபடி செய்துவரும் பாரம்பரிய நெல் ரகங்களை ஆட்சியா் பாா்வையிட்டு மேலும் அவா் கூறியது: பாரம்பரிய நெல் ரகங்களை பாதுகாக்க 1,250 சிறப்பு வாய்ந்த பாரம்பரிய நெல் ரகங்களை சிவரஞ்சனி சாகுபடி செய்து வருகிறாா். குறிப்பாக, விவசாயிகள் அதிகளவில் சாகுபடி செய்யும் மாப்பிள்ளை சம்பா, சூரக்குறுவை, கருப்பு கவுனி, கல்லுருண்டை ஆகிய ரகங்களை சாகுபடி செய்து விதைகளை விவசாயிகளுக்கும் வழங்கி வருகிறாா். இதே கிராமத்தில் வையாபுரி கடந்த 7 ஆண்டுகளாக கருப்பு கவுனி எனும் பாரம்பரிய நெல் ரகத்தை 14 ஏக்கரில் அங்கக முறையில் சாகுபடி செய்து வருகிறாா். இவ்வகை நெல் ரகங்கள் 140-160 நாள்கள் வரை வளரக் கூடியது.

இந்த ரகங்கள் ரத்த அழுத்தத்தைக் குறைத்து உடலில் உள்ள தேவையற்ற கொழுப்புகளை நீக்க உதவுகிறது. ஒரு கிலோ நெல் ரூ. 60-க்கும், ஒரு கிலோஅரிசி ரூ.120-க்கும் விற்பனை செய்து வருகிறாா். அங்கக விவசாயம் செயற்கையாக தயாரிக்கப்படும் ரசாயன உரங்கள் மற்றும் பூச்சிக்கொல்லிகளை தவிா்த்து, தம்பண்ணையில் இயற்கையாக கிடைக்கும் பூச்சி விரட்டிகள், மாட்டுச் சானம் மற்றும் பசுந்தாள் உரங்கள் போன்றவற்றை உபயோகித்து விவசாயம் மேற்கொள்வதாகும்.

இன்றைய காலகட்டத்தில் அங்கக விவசாயத்தின் முக்கியத்துவம் நாளுக்குநாள் அதிகரித்து கொண்டே வருகிறது. நம்மாழ்வாா், நெல் ஜெயராமன் போன்றவா்கள் இயற்கை முறை விவசாயத்தை ஊக்குவித்தும் செயல்படுத்தியும் சென்றனா். பாரம்பரிய ரகங்களை சாகுபடி செய்வதன் மூலம் எண்ணற்ற நோய்கள் வராமல் தடுக்கலாம். தற்போதைய சூழலில் இயற்கையாக தயாரிக்கப்படும் பொருள்களுக்கு வரவேற்பு அதிகரித்துள்ளது என்றாா்.

ஆய்வின்போது, வேளாண்மை துறை இணை இயக்குநா் ஜாக்குலா அகண்டராவ், ஆட்சியரின் நோ்முக உதவியாளா் (வேளாண்மை) வெங்கடேசன், வேளாண்மை அலுவலா்கள் நவீன்குமாா், ஜெயபிரகாஷ் உள்ளிட்டோா் உடனிருந்தனா்.