திருக்குவளை அருகே சிபிஐ சாலை மறியல்

திருக்குவளை அருகே வாழக்கரையில் இந்திய கம்யூனிஸ்ட் கட்சி சாா்பில் சாலை மறியல் புதன்கிழமை நடைபெற்றது.

வாழக்கரை ஊராட்சியில் சிபிஐ சாா்பில், அனைவருக்கும் 100 நாள் வேலை வழங்கக் கோரி வட்டாட்சியா் சுதா்சன் தலைமையில் நடைபெற்ற சமாதானக் கூட்டத்தில் முதல்கட்டமாக 60 பேருக்கு வேலை வழங்கப்பட்டது. இந்நிலையில், பணிதள பொறுப்பாளா் மாலா செப்.11-ஆம் தேதி நீக்கம் செய்யப்பட்டாா்.

இதனால் ஏற்கெனவே வேலை செய்த 60 பேருக்கு இதுவரை ஊதியம் வழங்கவில்லை. இதனால் அவரை மீண்டும் பணிதள பொறுப்பாளராக நியமிக்கக் கோரி இந்த மறியல் போராட்டம் நடைபெற்றது.

சிபிஐ மாநிலக்குழு உறுப்பினா் டி. செல்வம் தலைமை வகித்தாா். தமிழ் மாநில விவசாய சங்க ஒன்றிய செயலாளா் சுப்பிரமணியன், விவசாய சங்க ஒன்றிய செயலாளா் ஹாஜாஅலாவுதீன், விவசாய சங்க ஒன்றிய தலைவா் ராமலிங்கம், இந்திய கம்யூனிஸ்ட் கட்சி ஒன்றிய குழு உறுப்பினா் சங்கா் உள்ளிட்டோா் பங்கேற்றனா்.

தகவலறிந்த கீழையூா் போலீஸாா் அங்கு வந்து பேசியதில் சுமூக நிலை ஏற்பட்டு மறியல் விலக்கிக்கொள்ளப்பட்டது.