பெருந்தோட்டம் ஏரியில் நீா்வரத்து அதிகரிப்பு

பெருந்தோட்டம் ஏரியில் தண்ணீா் நிரம்பி வருவது விவசாயிகளிடையே மகிழ்ச்சியை ஏற்படுத்தியுள்ளது.

திருவெண்காடு அருகே பெருந்தோட்டம் கிராமத்தில் சுமாா் 250 ஏக்கா் கொள்ளளவு கொண்ட ஏரி உள்ளன. இந்த ஏரியின் மூலம் பெருந்தோட்டம், திருவெண்காடு, மங்கைமடம், எம்பாவை, தென்னாம்பட்டினம், கோனையாம்பட்டினம், சின்ன பெருந்தோட்டம் உள்ளிட்ட கிராமங்களில் உள்ள சுமாா் 2,500 ஏக்கா் பாசன வசதி பெறுகிறது. இந்த ஏரியில் தண்ணீா் நிரப்ப வேண்டும் என பொதுமக்கள் கோரிக்கை விடுத்து வந்தனா்.

கல்லணையில் இருந்து முறை வைத்து பாசனத்திற்கு தண்ணீா் திறந்து விடப்படுகிறது. கடந்த சில நாட்களாக காவிரியில் தண்ணீா் திறக்கப்படுகிறது. காவிரியில் வரும் நீரை மயிலாடுதுறையிலிருந்து கடாரம் கொண்டான் என்ற இடத்தில் உள்ள ரெகுலேட்டரில் இருந்து மணிகா்ணகை ஆற்றின் வழியாக கடந்த 4 நாட்களாக தண்ணீா் வழங்கப்படுகிறது. தற்போது பெருந்தோட்டம் ஏரியில் தண்ணீா் வரத்து அதிகரித்து நிரம்ப தொடங்கியுள்ளது.

இதுகுறித்து அந்தப் பகுதி விவசாயிகள் கூறுகையில், தற்பொழுது பெருந்தோட்டம் ஏரியில் தண்ணீா் வரத்து அதிகரித்து காணப்படுகிறது. மேலும் மழை பெய்து வருவதால் விரைவில் பெருந்தோட்டம் ஏரி நிரம்பும் என நம்புகிறோம். தண்ணீா் திறக்க ஏற்பாடு செய்த செந்தில்செல்வன் எம்எல்ஏ, மயிலாடுதுறை நீா்வளத்துறை கோட்ட உதவி செயற்பொறியாளா் சங்கா் மற்றும் நீா்வளத்துறையினருக்கு நன்றி தெரிவித்துக் கொள்வதாக கூறினா்.