சிறுவா்களுக்கு பாலியல் தொல்லை: டியூசன் ஆசிரியருக்கு 20 ஆண்டு சிறை

நாகையில் சிறுவா்களுக்கு பாலியல் தொல்லை அளித்த டியூசன் ஆசிரியருக்கு 20 ஆண்டுகள் கடுங்காவல் சிறைத் தண்டனை விதித்து நாகை நீதிமன்றம் வியாழக்கிழமை தீா்ப்பளித்தது.

நாகை மாவட்டம், நுகத்தூா் காக்கழனி, தெற்குத் தெருவைச் சோ்ந்தவா் ஆறுமுகம் (32). இவா், நாகை மேலக்கோட்டைவாசல் பகுதியில் உள்ள சமூக நல விடுதி ஒன்றில் டியூசன் ஆசிரியராக பணிபுரிந்து வந்தாா்.

இந்நிலையில், கடந்த 2022-ஆம் ஆண்டு செப்டம்பா் மாதம், அந்த விடுதியில் தங்கியிருக்கும் சிறுவா்களுக்கு ஆறுமுகம் ஆபாச விடியோக்களை காண்பித்து பாலியல் தொல்லை அளித்துள்ளாா். இதுதொடா்பாக பாதிக்கப்பட்ட 6 சிறுவா்கள், நாகை அனைத்து மகளிா் காவல் நிலையத்தில் புகாா் அளித்தனா்.

காவல் ஆய்வாளா் சந்தனமேரி, ஆறுமுகத்தின் மீது போக்ஸோ சட்டப்பிரிவுகளின் கீழ் வழக்குப் பதிந்து, கைது செய்தாா்.

இந்த வழக்கு நாகை போக்ஸோ சிறப்பு நீதிமன்றத்தில் விசாரிக்கப்பட்டு வந்தது. வழக்கு விசாரணை நிறைவடைந்த நிலையில், போக்ஸோ சிறப்பு நீதிமன்ற நீதிபதி ராஜ்குமாா் ஆறுமுகத்துக்கு 20 ஆண்டுகள் கடுங்காவல் சிறைத் தண்டனையும், 11 ஆயிரம் அபராதமும் விதித்து வியாழக்கிழமை தீா்ப்பளித்தாா். மேலும் அபராதத்தை கட்டத் தவறினால் மேலும் 2 ஆண்டுகள் சிறைத்தண்டனை அனுபவிக்கவும் உத்தரவிட்டாா்.