திறனறி தேர்வுகளில் பங்கேற்க சிறப்பு பயிற்சி வகுப்பு

திருவாரூர் மாவட்டத்தில் திறனறி தேர்வுகளில் பங்கேற்கும் வகையில் சிறப்பு பயிற்சி வகுப்பு சனிக்கிழமை தொடங்கியது. 
பள்ளிக் கல்வித் துறை, ஒருங்கிணைந்த பள்ளிக் கல்வித் திட்டத்தின் மூலம் 9 மற்றும் பத்தாம் வகுப்புகளில் படித்து வரும் மாணவர்களில் திறமை மிக்க மாணவர்களை கண்டறிந்து அவர்களுக்கு தேசிய திறனறித் தேர்வுகளில் வெற்றி பெறும் வகையில் தேர்வுகளுக்கான வழிகாட்டுதல் பயிற்சி வகுப்புகள் அளிக்கப்பட  உள்ளன.  வாரந்தோறும் சனிக்கிழமை, ஞாயிற்றுக்கிழமை, காலாண்டு மற்றும் அரையாண்டு விடுமுறை நாள்களில் இப்பயிற்சி வகுப்பு நடைபெறவுள்ளது. கல்வி மாவட்டத்துக்கு ஒரு மையம் வீதம் திருவாரூர் மாவட்டத்தில் 2 மையங்களில் நடைபெறுகிறது. திருவாரூரில் புலிவலம் அரசு மேல்நிலைப்பள்ளியிலும்,  மன்னார்குடியில் தேசிய மேல்நிலைப்பள்ளியிலும் பயிற்சி நடைபெறுகிறது. இதில், 100 மாணவர்கள் கலந்து கொள்கின்றனர். 
திருவாரூர் மையத்தில் மாவட்ட முதன்மைக் கல்வி அலுவலர் ந. மாரிமுத்து பயிற்சியை தொடங்கி வைத்தார்.  இதில், மாவட்ட உதவித் திட்ட ஒருங்கிணைப்பாளர் க. கலைவாணன், பயிற்சி மைய ஒருங்கிணைப்பாளர் வ. ராஜன் ஆகியோர் பங்கேற்றனர். முதுகலை ஆசிரியர் கோ. கெளதமன், பட்டதாரி ஆசிரியர் எஸ். சக்திவேல் ஆகியோர் கருத்தாளர்களாக செயல்பட்டனர். ஏற்பாடுகளை, கல்வி மாவட்ட ஒருங்கிணைப்பாளர் செ. பாண்டியன் செய்திருந்தார்.