வயலில் மாடு மேய்ந்ததில் தகராறு

மன்னார்குடி அருகேயுள்ள களப்பாலில் வயலில் மாடு மேய்ந்ததில் ஏற்பட்ட தகராறில், போலீஸார்  இருவரை வியாழக்கிழமை கைது செய்தனர். 
களப்பால் அருகேயுள்ள நல்லநாயகிபுரத்தை சேர்ந்தவர் ரமேஷ் மனைவி உஷா. இவர் வியாழக்கிழமை அதே பகுதியில் உள்ள தரிசு நிலத்தில் மாடுகளை மேய்ச்சலுக்கு விட்டிருந்தாராம். மாடுகள் அருகில் பழனி என்பவரது வயலில் இறங்கிவிட்டதாம். இதையறிந்த, பழனி, உஷாவை தகாத வார்த்தைகளால் பேசி கண்டித்ததாக கூறப்படுகிறது. இதுகுறித்து உஷா கணவர் ரமேஷிடம் தெரிவித்துள்ளார். இதில், ஆத்திரமடைந்த ரமேஷ், பழனி வீட்டுக்குச் சென்று பிரச்னை குறித்து பேசியபோது, இருதரப்பினருக்கும் ஏற்பட்ட வாய்த்தகராறில் பழனி, அவரது சகோதரர் வெற்றி ஆகிய இருவரும் ரமேஷை உருட்டுக் கட்டையால் தாக்கியனார்களாம்.  இதில், காயமடைந்த ரமேஷ் (44) திருத்துறைப்பூண்டி அரசு மருத்துவமனையில் சிகிச்சைக்காக அனுமதிக்கப்பட்டுள்ளார். இதுகுறித்து, களப்பால் காவல் நிலையத்தில் அளித்த புகாரின்பேரில், போலீஸார் வழக்குப் பதிந்து பழனி (37), வெற்றி(34) ஆகிய இருவரை கைது விசாரணை மேற்கொண்டுள்ளனர்.