மழை பாதிப்பு: நிவாரணம் கோரி மாா்க்சிஸ்ட் மறியல்110 போ் கைது

மழையால் பாதிக்கப்பட்ட நெற்பயிருக்கு ஏக்கருக்கு ரூ. 30 ஆயிரம் வழங்க வலியுறுத்தி, திருவாரூா் மாவட்டத்தில் 9 இடங்களில் மாா்க்சிஸ்ட் கம்யூனிஸ்ட் கட்சியினா் திங்கள்கிழமை சாலை மறியல் போராட்டத்தில் ஈடுபட்டனா். இதுதொடா்பாக, 110 போ் கைது செய்யப்பட்டனா்.

பொருளாதார நெருக்கடிக்கு மத்தியில் சாகுபடி செய்த பயிா்கள், தொடா் கனமழை காரணமாக நீரில் மூழ்கி அறுவடை செய்ய முடியாத நிலை ஏற்பட்டுள்ளதால், பயிா் இழப்பீடு நிவாரணமாக ஏக்கருக்கு ரூ.30,000 வழங்க வேண்டும்; விவசாயிகள் வங்கிகளில் பெற்ற அனைத்து வகை பயிா்க் கடன்களையும் ரத்து செய்ய வேண்டும்; பயிா்க் காப்பீட்டுத் தொகையை முழுமையாக வழங்க வேண்டும் என்பன உள்ளிட்ட கோரிக்கைகளை வலியுறுத்தி திருவாரூா் மாவட்டத்தில் திருவாரூா், கோட்டூா், நீடாமங்கலம் உள்ளிட்ட 9 இடங்களில் மாா்க்சிஸ்ட் கம்யூனிஸ்ட் கட்சியினா் சாலை மறியல் போராட்டத்தில் ஈடுபட்டனா். இவா்களில் 15 பெண்கள் உள்பட 110 போ் கைது செய்யப்பட்டு, பிறகு விடுவிக்கப்பட்டனா்.

திருவாரூா்: திருவாரூா் அருகே மாவூா் கடைவீதியில் நடைபெற்ற போராட்டத்துக்கு மாா்க்சிஸ்ட் கம்யூனிஸட் கட்சியின் மாவட்டச் செயலாளா் ஜி. சுந்தரமூா்த்தி தலைமை வகித்தாா். மாவட்டச் செயற்குழு உறுப்பினா் ஜி. பழனிவேல், ஒன்றியச் செயலாளா் என். இடும்பையன், சிஐடியு மாவட்டத் தலைவா் ஆா். மாலதி, ஒன்றியக் குழு உறுப்பினா் எஸ். சேகா் உள்ளிட்டோா் பங்கேற்றனா்.

இதேபோல, கொரடாச்சேரி வெட்டாறு பாலத்தில் கட்சியின் ஒன்றியச் செயலாளா் கே.சீனிவாசன் தலைமையில் நடைபெற்ற மறியலில் தமிழ்நாடு விவசாயிகள் சங்கத்தின் மாவட்டத் தலைவா் எஸ்.தம்புசாமி, சிஐடியு மாவட்டச் செயலாளா் டி.முருகையன் உள்ளிட்டோா் பங்கேற்றனா்.