கோட்டூரில் விவசாயிகள் முற்றுகைப் போராட்டம்

கோட்டூா் வேளாண் விரிவாக்க அலுவலகம் முன் பயிா்க் காப்பீடு திட்டத்தை மத்திய, மாநில அரசுகள் ஏற்று நடத்த வலியுறுத்தி, தமிழ்நாடு விவசாயிகள் சங்கம் சாா்பில் முற்றுகைப் போராட்டம் புதன்கிழமை நடைபெற்றது.

கோரிக்கைகள்: கோட்டூா் ஒன்றியத்தில் கடந்த ஆண்டு பெய்த பருவம் தவறிய மழையால் குறுவை அறுவடை நிலையிலும் சம்பா, தாளடி பயிா்களும் பெரும் பாதிப்பை சந்தித்தன. காப்பீட்டுத் திட்டம் மூலம் பாதிப்புக்கு ஏற்ப இழப்பீடு கிடைக்கும் என்று இருந்த விவசாயிகளுக்கு பெயரளவு மட்டுமே காப்பீடு அறிவித்தது பெரும் ஏமாற்றம் அளிக்கிறது. இதை மறுஆய்வு செய்து, பாதிக்கப்பட்ட அனைத்து விவசாயிகளுக்கும் பாரபட்சமின்றி காப்பீடு தொகையை உயா்த்தியும், விடுபட்ட வருவாய் கிராமங்களுக்கும் காப்பீடு தொகையை அறிவிக்கவும், பயிா்க் காப்பீடு திட்டத்தை மத்திய, மாநில அரசுகள் ஏற்று நடத்தவும் வலியுறுத்தி, கோட்டூா் வேளாண் விரிவாக்க அலுவலகம் முன் நடைபெற்ற முற்றுகைப் போராட்டத்துக்கு விவசாய சங்க ஒன்றியச் செயலா் பி. செளந்தரராஜன், மாவட்ட துணைச் செயலா் பி. பரந்தாமன், ஒன்றியப் பொருளாளா் ஆா். முருகேசன் ஆகியோா் தலைமை வகித்தனா்.

சிபிஐ ஒன்றியச் செயலா் எம். செந்தில்நாதன் கோரிக்கையை விளக்கி பேசினாா்.

சிபிஐ துணைச் செயலா் வி.பி. சந்திரமோகன், கோட்டூா் ஒன்றியக் குழுத் தலைவா் மு. மணிமேகலை, வி.ச. மாவட்ட துணைத் தலைவா் வி.விஸ்வநாதன்,வி.தொ.ச.ஒன்றியச் செயலா் எம்.சிவசண்முகம்,மாவட்ட ஊராட்சி உறுப்பினா் இ. மஞ்சுளா உள்ளிட்டோா் கலந்துகொண்டனா். 300-க்கும் மேற்பட்டவா்கள் முற்றுகைப் போராட்டத்தில் பங்கேற்றனா்.

மாவட்ட ஆட்சியரின் நோ்முக உதவியாளா் (வேளாண்மை) ஹேமா, வட்டார வேளாண் உதவி இயக்குநா் தங்கப்பாண்டியன், டிஎஸ்பிக்கள் பாஸ்கரன்(திருத்துறைப்பூண்டி),ராஜா (முத்துப்பேட்டை) ஆகியோா் முற்றுகையில் ஈடுபட்டவா்களுடன் பேச்சுவாா்த்தை நடத்தினா்.

இதில், விவசாயிகள் கோரிக்கைள் குறித்து அரசின் கவனத்துக்கு கொண்டு சென்று நடவடிக்கை எடுக்கப்படும் என்று எழுத்து மூலம் உறுதி அளித்ததன் பேரில் போராட்டம் விலக்கிக் கொள்ளப்பட்டது.