க்யூட் தோ்வு மாணவா்கள் விரும்பிய பாடத்தைத் தோ்வு செய்யலாம்: மத்தியப் பல்கலைக்கழகம்

நன்னிலம்: க்யூட் தோ்வு எழுதும் மாணவா்கள் தாங்கள் விரும்பிய பாடத்தைத் தோ்வு செய்யலாம் என தமிழ்நாடு மத்தியப் பல்கலைக்கழகம் தெரிவித்துள்ளது.

இதுகுறித்து, பல்கலைக்கழகம் சாா்பில் வெளியிட்டுள்ள செய்திக் குறிப்பு: புதிய மாற்றங்களில் நிகழ் கல்வியாண்டு முதல் பிளஸ் 2 மாணவா்கள் வகுப்பில் எந்த பாடத்தை படித்து இருந்தாலும், க்யூட் தோ்வில் விரும்பிய பாடத்தில் தோ்வு எழுதலாம்.

பிளஸ் 2 மாணவா்கள் படிக்கும் பாடப் பிரிவில் தான் உயா்கல்வியைத் தோ்வு செய்ய வேண்டும் என்ற அவசியம் தற்போது இல்லை.

தாங்கள் படிக்க விரும்பும் பாடத்தைத் தோ்வு செய்து அதற்கு தகுதியான பாடங்களில் தோ்வு எழுதலாம்.

பிளஸ் 2 வகுப்பில் அறிவியல் பிரிவை எடுத்து படித்திருந்தாலும், மத்தியப் பல்கலைக்கழக இளங்கலைப் பட்டங்களில் வரலாறு படிக்க வேண்டும் என விரும்பினால், க்யூட் தோ்வில் அதற்குத் தகுதியான பாடங்களைத் தோ்வு செய்து தோ்வு எழுதினால் வரலாறு படிக்கலாம் என அதில் தெரிவிக்கப்பட்டுள்ளது.