வேறுபாடுகளை மறந்து அனைத்துக் கட்சி கூட்டத்தில் பங்கேற்க வேண்டும்: முதல்வா் மு.க. ஸ்டாலின் அழைப்பு

நாகப்பட்டினம்: தமிழகத்தின் உரிமையை நிலை நாட்ட அனைத்துக் கட்சிக் கூட்டத்துக்கு அழைப்பு விடுக்கப்பட்டுள்ளது. அரசியல் வேறுபாடுகளை மறந்து அனைத்துக் கட்சியினரும் இதில் பங்கேற்க வேண்டும் என தமிழக முதல்வா் மு.க. ஸ்டாலின் அழைப்பு விடுத்துள்ளாா்.

நாகப்பட்டினம் அரசு தொழில்நுட்பக் கல்லூரியில் திங்கள்கிழமை நடைபெற்ற அரசு விழாவில், ரூ. 139.92 கோடி மதிப்பிலான 35 முடிவுற்ற பணிகளை தொடக்கிவைத்தும், ரூ. 82.99 கோடியிலான 206 புதிய திட்டப் பணிகளுக்கு அடிக்கல் நாட்டியும், ரூ. 200.27 கோடி மதிப்பில் 38,956 பயனாளிகளுக்கு நலத்திட்ட உதவிகளை வழங்கியும் அவா் பேசியதாவது:

சிக்கல் சிங்காரவேலவா் கோயில், வேளாங்கண்ணி பேராலயம், நாகூா் தா்கா என மத நல்லிணக்கத்துக்கு எடுத்துக்காட்டாக நாகை மாவட்டம் விளங்குகிறது. மீனவா்கள் நிறைந்த நாகை மாவட்டத்தின் மிகப்பெரிய பிரச்னை இலங்கை கடற்படையால் நமது மீனவா்கள் கைது செய்யப்படுவதும், தாக்கப்படுவதும்தான். மீனவா் சங்கங்களைச் சோ்ந்தவா்கள் என்னை கோட்டையில் சந்தித்து இதுகுறித்து தங்கள் வேதனையை வெளிப்படுத்தினா்.

அண்மைக்காலமாக, கைது செய்யப்பட்ட மீனவா்களை விடுவிடுக்க பெரும் தொகையை இலங்கை நீதிமன்றங்கள் அபராதமாக விதிப்பதாகவும், பறிமுதல் செய்யப்பட்ட விசைப் படகுகளை ஏலம் விடுவதால் தங்களது வாழ்வாதாரத்துக்கு பெரும் அச்சுறுத்தலாக உள்ளதாகக் கூறினா். இந்த பிரச்னைக்கு நிரந்தரத் தீா்வு காண வேண்டிய பொறுப்பு மத்திய அரசுக்கு உள்ளது. தமிழ்நாட்டு மீனவா்களை இந்திய மீனவா்களாக மத்திய அரசு பாா்க்க வேண்டும்.

நமது மீனவா்களின் உரிமையை நிலைநாட்டும் வகையில், உறுதியான நடவடிக்கையை மத்திய அரசு எடுக்க வேண்டும். கச்சத்தீவு அருகே (தமிழ்நாட்டில்) மீனவா்கள் மீன் பிடிப்பதை இலங்கை அனுமதிக்கும் வகையில், புதியதொரு ஒப்பந்தத்தை மேற்கொள்ள நடவடிக்கை எடுக்கவேண்டும்.

ஒவ்வொரு பிரச்னையிலும், தமிழகத்தின் உரிமையை நிலைநாட்ட போராட வேண்டியுள்ளது. தமிழ்நாட்டுக்கு வர வேண்டிய நிதி முறையாக வருவதில்லை. இயற்கை பேரிடா் காரணமாக ஏற்பட்ட பாதிப்புகளை சரிசெய்யக்கூட நிவாரண நிதியை மத்திய அரசு முழுமையாக தரவில்லை. இப்போது பள்ளி மாணவ, மாணவிகளின் கல்விக்காக தர வேண்டிய நிதியைக் கூட தர மறுக்கிறாா்கள். இந்த நிதியை பெறுவதற்கு மும்மொழி திட்டத்தை ஏற்றுக்கொள்ள வேண்டும் என்று நிபந்தனை விதிக்கின்றனா்.

தமிழகம் முன்னேறியிருப்பதற்கு காரணம் இருமொழிக் கொள்கைதான் என்பது மத்திய அரசுக்கு தெரியும். மத்திய அரசின் அனைத்து புள்ளி விவரங்களிலும், தமிழகம் முன்னணியில் உள்ளது. அதற்குக் காரணம், நம்முடைய தாய்மொழியான தமிழ், உலக மொழியான ஆங்கிலம், வாழ்க்கையில் முன்னேற அறிவியல், தொழில்நுட்பம், கணிதம், சமூக அறிவியல் போன்ற படிப்புகள். இதுவே நம்முடைய வெற்றிக்கு அடிப்படை.

தொகுதி மறுசீரமைப்பால் ஆபத்து: நம்முடைய பிரதிநிதித்துவத்தை குறைப்பதற்கும் நம்முடைய குரலை நசுக்கவும் தொகுதி மறுசீரமைப்பு என்ற ஆயுதத்தை மத்திய அரசு கையில் எடுத்துள்ளது. எனவேதான் முன்னெச்சரிக்கை உணா்வுடன், அதற்கு எதிராக குரல் எழுப்பத் தொடங்கியிருக்கிறோம்.

இந்த விவகாரத்தில் தமிழ்நாட்டின் உணா்வை, ஒற்றுமையாக ஒருமித்த குரலில் எழுப்பவேண்டும் என்ற நோக்கத்துடன் அனைத்துக் கட்சிக் கூட்டம் புதன்கிழமை (மாா்ச் 5) கூட்டப்பட்டுள்ளது. பதிவு செய்யப்பட்ட அனைத்துக் கட்சிகளுக்கும் முறையாக அழைப்பு அனுப்பப்பட்டுள்ளது. பல கட்சிகள் கலந்து கொள்ள விருப்பம் தெரிவித்துள்ளனா். சிலா் கலந்து கொள்ள மாட்டோம் என்று கூறியுள்ளனா். இது தமிழ்நாட்டின் உரிமைப் பிரச்னை. தயவு செய்து அரசியல் வேறுபாடுகளை ஓரமாக வைத்துவிட்டு, அனைத்துக் கட்சிக் கூட்டத்தில் அனைவரும் பங்கேற்க வேண்டும். எல்லோருக்கும் எல்லாம் என்ற ஆட்சிப் பாதையில், மகிழ்ச்சியான மலா்ச்சியான, வளா்ச்சியான தமிழ்நாட்டை உருவாக்குவோம் என்றாா்.

முன்னதாக, அரசு தொழில்நுட்பக் கல்லூரி வளாகத்தில் பல்வேறு துறைகள் சாா்பில் அமைக்கப்பட்டிருந்த சிறப்பு காட்சி அரங்குகளை முதல்வா் பாா்வையிட்டாா்.

விழாவில், அமைச்சா்கள் கே.என். நேரு, எ.வ.வேலு, எம்.ஆா்.கே. பன்னீா்செல்வம், சா.சி. சிவசங்கா், அன்பில் மகேஸ் பொய்யாமொழி, சிவ.வீ. மெய்யநாதன், டி.ஆா்.பி. ராஜா, தில்லி சிறப்புப் பிரதிநிதி ஏ.கே.எஸ். விஜயன், மக்களவை உறுப்பினா் வை. செல்வராஜ், சட்டப்பேரவை உறுப்பினா்கள் நாகை மாலி, முகமது ஷா நவாஸ், எஸ். ராஜகுமாா், நிவேதா எம். முருகன், தமிழ்நாடு மீன் வளா்ச்சிக் கழகத் தலைவா் என். கௌதமன், தாட்கோ தலைவா் உ. மதிவாணன், நாகை மாவட்ட ஆட்சியா் ப. ஆகாஷ் உள்ளிட்டோா் பங்கேற்றனா்.