மீண்டும் நிறம் மாறும் சாலைத் தடுப்புகள்! என்டிஎம்சி நடவடிக்கை

விபத்துகளைத் தடுக்கும் நோக்கில் தில்லியின் முக்கியச்  சாலைகளில் உள்ள தடுப்புகளை மீண்டும் கருப்பு - மஞ்சள் மற்றும் கருப்பு - வெள்ளை நிறங்களுக்கு மாற்றும் பணிகளை புது தில்லி முனிசிபல் கவுன்சில் (என்டிஎம்சி) மேற்கொண்டுள்ளது.

மத்தியில் பிரதமர் நரேந்திர மோடி தலைமையிலான அரசு கடந்த ஆண்டு பொறுப்பேற்றது. இதைத் தொடர்ந்து தில்லியில் உள்ள முக்கியச் சாலைகளான ஃபெரோஷா ரோடு, அசோகா ரோடு, நாடாளுமன்றச் சாலை, ராஜீவ் செளக், ஜந்தர் மந்தர், ஆர்.கே.ஆஸ்ரம் உள்ளிட்ட பகுதிகளில் உள்ள சாலைத் தடுப்புகளுக்குப் புதிய வர்ணம் தீட்டும் பணிகளை 2014, அக்டோபர் மாதம் என்டிஎம்சி மேற்கொண்டது.

 அப்போது கருப்பு - வெள்ளை மற்றும் கருப்பு - மஞ்சள் ஆகிய நிறங்களில் இருந்த சாலை தடுப்புகள், பச்சை - ஊதா நிறத்துக்கு மாற்றப்பட்டன. இந்நிறங்களால் இரவு நேரங்களில் விபத்துகள் ஏற்பட அதிக வாய்ப்பு உள்ளதாக வாகன ஓட்டிகளிடம் இருந்து அதிகப் புகார்கள் எழுந்தன. இதையடுத்து, பச்சை - ஊதா நிறத்துக்கு இடையே ஒளிரக்கூடிய வெள்ளி நிறப் பட்டை அமைக்குமாறு போக்குவரத்துக் காவல் துறையினர் என்டிஎம்சி நிர்வாகத்துக்கு அறிவுறுத்தினர். இதையடுத்து, இப்பட்டை பொருத்தப்பட்டது.

இந்நிலையில், சாலைத் தடுப்புகளின் நிறங்களை மீண்டும் கருப்பு - வெள்ளை, கருப்பு -  மஞ்சள் நிறத்துக்கே மாற்றும் பணிகளை என்டிஎம்சி நிர்வாகம் தற்போது மேற்கொண்டு வருகிறது. இதுகுறித்து என்டிஎம்சி அதிகாரிகளுக்கு தொடர்பு கொள்ள முயற்சித்த போது, அழைப்பை ஏற்கவில்லை.

 இதைத் தொடர்ந்து, சாலைத் தடுப்புகளின் நிறங்களை மாற்றும் நடவடிக்கை குறித்து தில்லி போக்குவரத்து காவல் துறையின் கூடுதல் ஆணையர் சரத் அகர்வால் கூறியதாவது:

 "இது என்டிஎம்சியின் தனிப்பட்ட முடிவாகும். எனினும், சாலை விதிகளின்படி வாகன விபத்துகளைத் தடுக்கும் வகையில் இவ்வகை தடுப்புகளுக்கு வர்ணம் பூச வேண்டும். ஏனெனில், தில்லியில் மாறுபட்ட கால நிலைகள் உள்ளன. பனிக் காலங்களில் சாலையோரங்களின் தடுப்புகள் வாகன ஓட்டிகளுக்கு தெளிவாகத் தெரிய வேண்டும் என்பதில் நாங்கள் உறுதியாக இருக்கிறோம். என்டிஎம்சியின் நடவடிக்கைகளை நாங்கள் கண்காணித்து வருகிறோம். சாலை விதிகளுக்கு மாறாக அவர்களின் செயல்பாடுகள் இருக்கும்பட்சத்தில் நாங்கள் அவர்கள் மீது நடவடிக்கை எடுப்போம்' என்றார்.