நாடாளுமன்றத்தில் ரவீந்திரநாத் தாகூருக்கு தலைவர்கள் மலர் மரியாதை

இலக்கியத்திற்கான நோபல் பரிசு பெற்றவரும், குருதேவ் என்று அன்புடன் அழைக்கப்பட்டவருமான வங்க மொழிக் கவிஞர் ரவீந்திரநாத் தாகூரின் பிறந்த நாளை ஒட்டி தில்லி நாடாளுமன்ற வளாகத்தில் உள்ள அவரது உருவப் படத்திற்கு தலைவர்கள் மலர் மரியாதை செய்தனர்.
நாடாளுமன்றத்தின் மைய அரங்கில் அமைந்துள்ள தாகூரின் உருவப் படத்திற்கு மத்திய நாடாளுமன்ற விவகாரம் மற்றும் நீர்வளத் துறை இணையமைச்சர் அர்ஜுன் ராம் மேஹவால், நாடாளுமன்ற விவகாரம் மற்றும் புள்ளியில், திட்ட அமலாக்கத் துறை இணையமைச்சர் விஜய் கோயல், முன்னாள் துணைப் பிரதமரும், மக்களவை நெறிமுறைக் குழுவின் தலைவருமான எல்.கே. அத்வானி ஆகியோர் மலர்தூவி மரியாதை செலுத்தினர்.
மேலும், மத்தியஅமைச்சர்கள், நாடாளுமன்ற உறுப்பினர்கள், மக்களவைச் செயலக பொதுச் செயலர் ஸ்நேஹலதா ஸ்ரீவாஸ்தவா, இரு அவைகளின் மூத்த அதிகாரிகள் பலர் மரியாதை செலுத்தும் நிகழ்ச்சியில் பங்கேற்றனர். மக்களவைச் செயலகத்தால் ஹிந்தி, ஆங்கில மொழிகளில் தயாரிக்கப்பட்ட ரவீந்திரநாத் தாகூரின் வாழ்க்கை வரலாறு அடங்கிய சிறு புத்தகம் நிகழ்ச்சியில் பங்கேற்றவர்களுக்கு வழங்கப்பட்டது. நாடாளுமன்ற மைய அரங்கில் ரவீந்திரநாத் தாகூரின் ஆளுயர உருவப் படம் 1958, செப்டம்பர் 12-ஆம் தேதி அப்போதைய குடியரசுத் தலைவராக இருந்த டாக்டர் ராஜேந்திர பிரசாத் மூலம் திறந்துவைக்கப்பட்டது.