ஊழல் தடுப்பு அதிகாரிகள் கூட்டத்தில் ரிசர்வ் வங்கி ஆளுநர் உரை

தில்லியில் உள்ள மத்திய ஊழல் கண்காணிப்பு அலுவலகத்தில்(சிவிசி) ரிசர்வ் வங்கி ஆளுநர் உர்ஜித் படேல் அடுத்த வாரம் உரையாற்ற உள்ளார்.
மத்திய ஊழல் கண்காணிப்பு ஆணையத்தின் தலைவராக சி.வி. செளதரி பொறுப்பேற்ற பிறகு, ஊழல் தடுப்பு அதிகாரிகளிடம் மற்ற அரசு உயர் அதிகாரிகள் உரை நிகழ்த்துவது மாதந்தோறும் நடைபெற்று வருகிறது.
இதுகுறித்து சிவிசி அமைப்பின் அதிகாரி ஒருவர் கூறியதாவது: ஊழல் தடுப்பு அதிகாரிகளிடம் வரும் செப்டம்பர் 20-ஆம் தேதி ரிசர்வ் வங்கி ஆளுநர் உர்ஜித் படேல் உரையாற்ற உள்ளார். வங்கித் துறை மற்றும் நிதித் துறையில் உள்ள முக்கிய பிரச்னைகள் குறித்து அதிகாரிகளிடம் அவர் பேச உள்ளார். மத்திய அரசின் உயர் அதிகாரிகளிடம் ரிசர்வ் வங்கி ஆளுநர் உரையாற்றுவது இதுவே முதல் முறை. அரசுத் துறைகள் மற்றும் அரசு அதிகாரிகளின் ஊழல் நடவடிக்கைகளை கண்காணிக்கும் மூத்த அதிகாரிகள் இந்த கூட்டத்தில் பங்கு கொள்ள உள்ளனர்.
முன்னதாக, நிதி ஆயோக் சிஇஓ அமிதாப் காந்த், செபி அமைப்பின் முன்னாள் தலைவர் எம். தாமோதரன், இந்திய தனித்துவ அடையாள ஆணையத்தின் தலைவர் அஜய் பூஷண் பாண்டே உள்ளிட்ட பலர் சிவிசி அலுவலகத்தில் உரை நிகழ்த்தியுள்ளது குறிப்பிடத்தக்கது.