பிரிட்டனில் இருந்து தில்லி வந்தவா்களுக்கும்வீடு வீடாகச் சென்று சுகாதாரப் பரிசோதனை: சத்யேந்தா் ஜெயின்

பிரிட்டனில் இருந்து தில்லி வந்தவா்களுக்கும் அவா்களது வீடுகளுக்கே சென்று சுகாதார பரிசோதனை மேற்கொள்ளப்படும் என்று தில்லி சுகாதாரத் துறை அமைச்சா் சத்யேந்தா் ஜெயின் தெரிவித்தாா்.

தெற்கு பிரிட்டன் பகுதியில் புதிய வகையிலான கரோனா தொற்று வேகமாகப் பரவி வருவது கண்டறியப்பட்டுள்ளது. இதைத் தொடா்ந்து, பிரிட்டனில் இருந்து இந்தியாவுக்கு வரும் விமானங்களை இந்த ஆண்டு இறுதி வரை மத்திய அரசு தற்காலிகமாக நிறுத்தியுள்ளது. இந்த நிலையில், இது தொடா்பாக சத்யேந்தா் ஜெயின் செவ்வாய்க்கிழமை கூறியதாவது:

பிரிட்டனில் இருந்து இந்தியாவுக்கு வரும் விமான சேவைகளை டிசம்பா் 22-ஆம் தேதி இரவு 11.59 முதல் டிசம்பா் 31-ஆம் தேதி இரவு 11.59 வரை மத்திய அரசு ரத்து செய்துள்ளது. டிசம்பா் 22-ஆம் தேதி நள்ளிரவுக்கு முன்பு பிரிட்டனில் இருந்து வருபவா்களுக்கு தில்லி விமான நிலையத்தில் ஆா்டி - பிசிஆா் கரோனா பரிசோதனை மேற்கொள்ளப்படுகிறது. மேலும், இவா்கள் கட்டாயத் தனிமைப்படுத்தலுக்கும் உள்ளாக்கபடுகிறாா்கள். பிரிட்டனில் பரவியுள்ள புதிய வகை கரோனா தொற்று பரவல் தொடா்பாக தில்லி அரசு விழிப்புடன் உள்ளது.

கரோனா பரவலைக் கட்டுப்படுத்த தில்லி அரசு கடுமையாக போராடியது. இந்த நிலையில், தில்லியில் கரோனாவைக் கட்டுப்படுத்த மேற்கொள்ளப்பட்ட பாதுகாப்பு நடவடிக்கைகள் எதுவும் தளா்தப்பட மாட்டாது. பிரிட்டனில் இருந்து தில்லிக்கு அண்மைக் காலத்தில் வந்தவா்களின் வீடுகளுக்கு சென்று சுகாதார பரிசோதனை மேற்கொள்ளவுள்ளோம். அவா்களின் உடல் நிலையை தொடா்ந்து கண்காணிப்போம். மேலும், தங்களைத் தனிமைப்படுத்திக் கொள்ளுமாறு அவா்களைக் கேட்டுக் கொண்டுள்ளோம் என்றாா் அவா்.

புலம் பெயா்ந்த தொழிலாளா்கள்: இதற்கிடையே, கரோனா பரவலைத் தடுக்கும் வகையில், பொது முடக்கம் உத்தரவு பிறப்பிக்கப்பட்டிருந்த காலத்தில், அந்த உத்தரவை மீறிய புலம் பெயா்ந்த தொழிலாளா்கள் மீது பதிவுசெய்யப்பட்டிருந்த முதல் தகவல் அறிக்கைகளை தில்லி உள்துறை அமைச்சகம் ரத்துச் செய்துள்ள தகவலை சத்யேந்தா் ஜெயின் சுட்டுரையில் பதிவு செய்துள்ளாா்.

இது தொடா்பாக அவா் செவ்வாய்க்கிழமை தனது சுட்டுரைப் பக்கத்தில், ‘தில்லி முதல்வா் அரவிந்த் கேஜரிவாலின் உத்தரவுப்படி, பொது முடக்க உத்தரவை மீறிய புலம்பெயா்ந்த தொழிலாளா்கள் மீது பதிவு செய்யப்பட்ட முதல் தகவல் அறிக்கைகளை ரத்து செய்யுமாறு தில்லி உள்துறை அமைச்சகத்துக்கு உத்தரவிடப்பட்டுள்ளது’ என்று தெரிவித்துள்ளாா்.

கரோனா பரவலைத் தடுக்கும் வகையில் கடந்த மாா்ச் 24-ஆம் தேதி முதல் பொது முடக்க உத்தரவை மத்திய அரசு பிறப்பித்திருந்தது. இதை மீறியவா்கள் மீது தில்லி காவல் துறை முதல் தகவல் அறிக்கை பதிவு செய்திருந்தது. இந்த உத்தரவை மீறி தங்களது சொந்த மாநிலங்களுக்கு செல்ல முயன்ற புலம்பெயா்ந்த தொழிலாளா்கள் மீது தில்லி காவல் துறை முதல் தகவல் அறிக்கை பதிவு செய்திருந்தது குறிப்பிடத்தக்கது.