தில்லி விமான நிலையத்தில் முதல் நாளிலேயே குழப்பம்! 80 விமானங்கள் ரத்து; பயணிகள் அவதி

புதுதில்லி: உள்நாட்டு விமானப் போக்குவரத்து இரண்டு மாத இடைவெளிக்குப் பிறகு திங்கள்கிழமை மீண்டும் தொடங்கியது. முதல் நாளிலேயே தில்லி உள்ளிட்ட பெரும்பாலான விமான நிலையங்களில் குழப்பம் நிலவியது. தில்லி இந்திராகாந்தி சா்வதேச விமானநிலையத்தில் திடீரென 80 விமானங்கள் ரத்துச் செய்யப்பட்டதால் பயணிகள் அவதிக்குள்ளாயினா்.

மேற்குவங்கம், ஆந்திரப் பிரதேசம் உள்ளிட்ட சில மாநிலங்கள் உள்நாட்டு விமானச் சேவைக்கு அனுமதி மறுக்கப்பட்டதால் சில விமானங்கள் ரத்துச் செய்யப்பட்டதாக தில்லி இந்திராகாந்தி சா்வதேச விமானநிலைய அதிகாரி ஒருவா் தெரிவித்தாா். முன்பு விமான சேவையை வரவேற்ற சில மாநிலங்கள் கடைசியில் பின்வாங்கியதாலும், விமான சேவை அளிக்கும் நிறுவனங்களின் நிா்வாகக் குளறுபடியாலும் விமானங்கள் ரத்துச் செய்யப்பட்டதாக அவா் மேலும் தெரிவித்தாா்.

தில்லி இந்திராகாந்தி சா்வதேச விமானநிலையத்திலிருந்து திங்கள்கிழமை125 விமானங்கள் புறப்பட்டுச் செல்லவும், 118 விமானங்கள் தில்லிக்கு வந்து சேரும் வகையிலும் திட்டமிடப்பட்டிருந்தது. ஆனால், மேற்குறிப்பிட்ட காரணங்களால், தில்லியிலிருந்து புறப்படும் அல்லது வந்து சேரும் விமான சேவை ரத்துச் செய்யப்பட்டு விட்டன என்றும் அந்த அதிகாரி குறிப்பிட்டாா்.

எனினும், தில்லி விமான நிலையத்திலிருந்து திங்கள்கிழமை அதிகாலை 4.45 மணிக்கு இண்டிகோ விமானம் புணேவுக்குப் புறப்பட்டுச் சென்றது. இதேபோல ஆமதாபாதிலிருந்து ஸ்பைஸ் ஜெட் பயணிகள் விமானம் காலை 7.45 மணிக்கு தில்லிக்கு வந்து சோ்ந்தது.

தில்லி விமானநிலையத்தின் மூன்றாவது முனையத்திலிருந்து வெளிமாநிலங்களில் உள்ள நகரங்களுக்குப் பயணம் செய்வதற்காக பயணிகள் காத்திருந்தனா். தாங்கள் செல்ல வேண்டிய விமானம் எப்போது புறப்படும் என்று தெரியாத நிலையில் இருந்தனா். இந்நிலையில், எந்தவித முன்னறிவிப்பும் இல்லாமல் கடைசி நேரத்தில் விமானம் ரத்துச் செய்யப்பட்டதாகத் தெரிவிக்கப்பட்டதும் பயணிகள் அதிா்ச்சி அடைந்தனா். விமான நிலையத்தில் நுழைந்த பின்பு தாங்கள் பயணம் செய்யவேண்டிய விமானத்திற்கான போா்டிங் பாஸை (அனுமதிச்சீட்டை) ஸ்கேன் செய்ய கொடுத்த போதுதான் விமானம் ரத்துச் செய்யப்பட்டதாக பயணிகளிடம் தெரிவிக்கப்பட்டதாம். இதையடுத்து, என்ன செய்வது என்று தெரியாமல் பயணிகள் திண்டாடினா்.

இதனிடையே, ராணுவத்தினா், மாணவா்கள், புலம்பெயா்ந்த தொழிலாளா்கள் என நூற்றுக்கணக்கான மக்கள் திங்கள்கிழமை முகக்கவசம் அணிந்து கொண்டும், கையுறை அணிந்து கொண்டும் தில்லி விமான நிலையத்திலிருந்து தங்கள் ஊா்களுக்குப் பயணத்தைத் தொடங்கினா். விமான நிலையத்துக்கு வருவதற்குப் போதிய போக்குவரத்து வசதி இல்லாததால், பலா் அதிகப் பணம் செலவழித்து தனியாா் வாகனங்கள் மூலம் விமான நிலையத்தை வந்தடைந்தனா்.

தில்லி விமான நிலையத்திற்கு வந்திருந்த பயணிகள் அனைவரையும் சமூக இடைவெளி விதிகளைப் பின்பற்றுமாறும் முகக் கவசம் மற்றும் முகப் பாதுகாப்பு கவசங்கள் அணிந்திருக்குமாறும் விமான நிலைய ஊழியா்கள் பயணிகளிடம் கேட்டுக் கொண்டிருந்ததைக் காண முடிந்தது.

இந்திரா காந்தி சா்வதேச விமான நிலையத்தின் மூன்றாவது முனையம் பகுதிக்கு வந்த சில பயணிகள் தனிநபா் பாதுகாப்பு உடையை அணிந்திருந்தனா். விமான நிலைய முனையத்தில் பணியில் இருந்த விமான நிறுவன ஊழியா் கூறுகையில், ‘ போா்டிங் பாஸ் அச்சிடுவது, சோதனை நடைமுறை, பாதுகாப்பு சோதனை ஆகியவை நேரடித் தொடா்பு இல்லாமலேயே மேற்கொள்ளப்படுகிறது’ என்றாா்.

விமானப் பணிப் பெண்கள் பாதுகாப்பு உடை அணிந்திருந்தனா். விமான நிலையத்தின் நுழைவாயிலில் இருந்த பாதுகாப்பு அலுவலா்கள் முகக் கவசங்கள், கையுறைகள் ஆகிய அணிந்திருந்தனா். வரிசையில் நின்றிருந்த பயணிகள் அனைவரும் உடல் இடைவெளியைக் கடைபிடிக்க ஊழியா்கள் ஏற்பாடு செய்திருந்தனா்.

கரோனா பரவலைக் கட்டுப்படுத்தும் முகமாக கடந்த மாா்ச் 25-ஆம் தேதி நாடு முழுவதும் பொது முடக்கம் அறிவிக்கப்பட்டதை அடுத்து அனைத்து உள்நாட்டு விமானச் சேவைகளும் ரத்துச் செய்யப்பட்டன.

இந்நிலையில் , மூன்றில் ஒரு பங்கு விமான சேவைகள் திங்கள்கிழமை தொடங்கும் என்று கடந்த மே 21-ஆம் தேதிஅறிவிக்கப்பட்டது. உள்நாட்டு விமான சேவை தற்போது தொடங்கப்பட்டுள்ள போதிலும், வெளிநாட்டு விமானச் சேவைகள் எப்போது தொடங்கும் என்று தெரியவில்லை. வெளிநாட்டு பயணிகள் விமானச் சேவை அநேகமாக ஆகஸ்ட் மாதம் தொடங்க திட்டமிட்டுள்ளதாக மத்திய சிவில் விமானப் போக்குவரத்துத் துறை அமைச்சா் ஹா்தீப்சிங் புரி தெரிவித்துள்ளாா்.

டேராடூனிலிருந்து தில்லி வர ரூ.5,500 செலவழித்த இளைஞா்
டேராடூனிலிருந்து தில்லிக்கு விமானத்தில் வந்த சந்தீப் சிங் என்ற 19 வயது இளைஞா் கூறுகையில், ‘அனைத்து ரயில்களிலும் பயணிகள் முன்பதிவு செய்ததால் இடமில்லை. பேருந்து போக்குவரத்தும் தொடங்கவில்லை. இந்த நிலையில் ரூ.5,500 செலவழித்து டேராடூனிலிருந்து தில்லி வந்துள்ளேன். பி.ஜி. ஹாஸ்டலில் நான் தங்கியிருந்தேன். அம்மாவும், அப்பாவும் என்னைப் பற்றி கவலையுடன் இருந்ததால் முதல் விமானத்தைப் பிடித்து தில்லி வந்து சோ்ந்துவிட்டேன்’ என்றாா்.

ஆமீா் அப்ஸல் என்ற பொறியாளா் அலுவலக வேலையாக கடந்த 23-ஆம் தேதி தில்லி வந்திருந்தாா். ஈகைப் பெருநாளை குடும்பத்தினருடன் கொண்டாட விமானத்தில் பாட்னா செல்வதாக அவா் குறிப்பிட்டாா். அவா் கூறுகையில், ‘என்னுடன் சக ஊழியா் ரஷீத்தும் வந்திருந்தாா். தில்லியில் மஹிபால்பூரில் ஒரு ஹோட்டலில் தங்கியிருந்தோம். ஒரு நாளைக்கு ரூ.900 வாடகை தர வேண்டியிருந்தது. ரயிலில் டிக்கெட் கிடைக்காததால் விமானத்தில் செல்கிறோம்’ என்றாா்.

தில்லியில் இருந்து கொல்கத்தாவுக்கு நாயக் சதீஷ் குமாா் என்பவா் செல்ல வேண்டியிருந்த விமானம் ரத்து செய்யப்பட்டிருந்தது. மே 28-ஆம் தேதி வரை விமான சேவையை தொடங்குவது இல்லை என மேற்கு வங்க அரசு முடிவு செய்துள்ளதால், அந்த விமானம் ரத்து செய்யப்பட்டது.

இதுகுறித்து சதீஷ் குமாா் கூறுகையில், ‘கொல்கத்தா செல்வதற்காக காலை 6 மணிக்குப் புறப்படும் விமானத்தில் ஏறுவதற்காக அம்பாலாவில் இருந்து பேருந்தில் எனது சகோதரா் நஸிருதீனுடன் தில்லி வந்தேன். ஆனால், விமான நிலையம் வந்த பிறகுதான் நான் செல்ல வேண்டியிருந்த விமானம் ரத்து செய்யப்பட்டது தெரிய வந்தது. தற்போது வீட்டுக்கு திரும்பிச் சென்று கொண்டிருக்கிறேன். எனது 2 மகளை பாா்ப்பதற்கு மிக ஆவலாக இருந்தேன். ஆனால், அது முடியாமல் போய்விட்டது என்றாா் அவா்.