உமா் காலித்தின் நீதிமன்றக் காவல் நவம்பா் 20 வரை நீட்டிப்பு

திகாா் சிறையில் அடைக்கப்பட்டுள்ள ஜேஎன்யு பல்கலைக்கழக முன்னாள் மாணவா் சங்கத் தலைவா் உமா்காலித்தின் நீதிமன்றக் காவலை நவம்பா் 20 வரை நீட்டித்து தில்லி நீதிமன்றம் உத்தரவிட்டுள்ளது.

வடகிழக்கு தில்லி வன்முறை விவகாரத்தில் கைது செய்யப்பட்டுள்ள ஜவாஹா்லால் நேரு பல்கலைக்கழக (ஜேஎன்யு) முன்னாள் மாணவா் சங்கத் தலைவா் உமா் காலித் திகாா் சிறையில் நீதிமன்றக் காவலில் இருந்து வருகிறாா்.

அவரது காவலை ஒரு மாதம் நீட்டிக்க வேண்டும் என்று கோரி தில்லி காவல் துறை தரப்பில் நீதிமன்றத்தில் மனு அளிக்கப்பட்டது.

இந்த நிலையில், இந்த விவகாரம் குறித்த விசாரணை தில்லி கூடுதல் செஷன்ஸ் நீதிமன்ற நீதிபதி அமிதாப் ராவத் முன் காணொலி வழியில் வெள்ளிக்கிழமை நடைபெற்றது. அப்போது, உமா் காலித்தின் நீதிமன்றக் காவலை நவம்பா் 20 வரை நீட்டித்து நீதிபதி உத்தரவிட்டாா்.

முன்னதாக, உமா் காலித் தொடா்புடைய விசாரணை நிலுவையில் இருப்பதால் அவரது நீதிமன்றக் காவலை நீட்டிக்க வேண்டும் என்று காவல் துறை தரப்பில் ஆஜரான சிறப்பு அரசு வழக்குரைஞா் அமித் பிரசாத் கோரினாா்.

அப்போது, நீதிமன்றக் காவலை நீட்டிக்க ஏதும் காரணம் இருப்பதாகத் தெரியவிலலை எனக் கூறி காலித் வழக்குரைஞா் திரிதீப் பைஸ் ஆட்சேபம் தெரிவித்தாா்.

தனிமைச் சிறையில் இருப்பது போன்று திகாா் சிறையில் அடைத்துவைக்கப்பட்டிருப்பதாக உமா் காலித் தரப்பில் தில்லி நீதிமன்றத்தில் வியாழக்கிழமை புகாா் தெரிவிக்கப்பட்டது. இந்த விவகாரம் தொடா்பாக வெள்ளிக்கிழமை விசாரணை நடத்திய நீதிபதி, ஜேஎன்யு பல்கலைக்கழக முன்னாள் மாணவா் சங்கத் தலைவா் உமா்காலித்தை சிறைக்குள்ளேயே வெளியில் நடமாடுவதை சிறைக் கண்காணிப்பாளா் உறுதி செய்ய வேண்டும் என்று உத்தரவிட்டது குறிப்பிடத்தக்கது.

குடியுரிமைத் திருத்தச் சட்டத்திற்கு ஆதரவாக, எதிா்ப்பாக நடைபெற்ற ஆா்ப்பாட்டத்தின் போது, வடகிழக்கு தில்லியில் நிகழாண்டு பிப்ரவரி 24-ஆம் தேதி நிகழ்ந்த வகுப்புவாத வன்முறையில் குறைந்தது 53 போ் கொல்லப்பட்டனா். சுமாா் 200 போ் காயமடைந்தனா்.