புதிய மத்திய அமைச்சா்கள் பொறுப்பேற்பு

மத்திய அமைச்சரவையில் புதிதாக பதவி ஏற்றுக்கொண்ட அமைச்சா்களில் ஒருவரைத் தவிர பெரும்பாலானவா்கள் வியாழக்கிழமை தங்கள் அலவலகங்களில் பொறுப்பேற்றனா்.

பிரதமா் நரேந்திர மோடி தலைமையிலான அமைச்சரவை மாற்றியமைக்கப்பட்டு புதிதாக 15 கேபினேட் அமைச்சா்கள் உள்ளிட்ட 43 அமைச்சா்கள் புதன் கிழமை பதவியேற்றனா்.

மத்திய அமைச்சரவையில் புதிதாக பதவியேற்ற எட்டு கேபினேட் அமைச்சா்களில் அஸ்ஸாமை சோ்ந்த சா்வானந்த சோனோவால் வியாழக்கிழமை பொறுபேற்கவில்லை. மற்றவா்கள் தங்கள் பொறுப்புகளை வியாழக்கிழமை ஏற்றனா். முன்னாள் அஸ்ஸாம் முதல்வரான சா்வானந்த சோனோவாலுக்கு ஆயுஷ் அமைச்சகமும் துறைமுகங்கள், கப்பல், நீா்வழிப்போக்குவரத்து துறைகளும் ஒதுக்கப்பட்டுள்ளது. ஏற்கெனவே இணையமைச்சா்களாக இருந்து கேபினேட் அமைச்சா்களாக உயா்வு பெற்று பதிவியேற்ற ஏழு அமைச்சா்களிலும் தங்கள் துறை அலுவலங்களில் பொறுப்பேற்றனா்.

இதில் மத்திய நிதித் துறை இணையமைச்சராக இருந்து கேபினேட் அமைச்சராகியுள்ள அனுராக் சிங் தாக்குா் அவருக்கு ஒதுக்கப்பட்ட செய்தி தகவல் மற்றும் ஒலிபரப்பு அமைச்சகம் உள்ள சாஸ்திரி பவனில் வியாழக்கிழமை பொறுப்பேற்றாா். அவா் கூறுகையில், ‘எனக்கு வழங்கப்பட்ட பொறுப்புகளில் பிரதமரின் எதிா்பாா்ப்புகளை பூா்த்தி செய்யும் அளவிற்கு பணியாற்றுவேன்’ என்றாா். அவருக்கு கீழே நியமிக்கப்பட்டுள்ள செய்தி தகவல் மற்றும் ஒலிபரப்பு துறையின் இணையமைச்சராக எல். முருகனும் பொறுப்பேற்றுக் கொண்டாா். அப்போது தமிழக பாஜக முன்னாள் தலைவா் சி.பி.ராதாகிருஷ்ணன் உள்ளிட்டோா் உடனிருந்தாா்.

இளைஞா் நலன் மற்றும் விளையாட்டுத் துறை அமைச்சராகவும் அனுராக் தாக்குா் பொறுப்பேற்றாா். இதே துறைக்கு இணையமைச்சராக நியமிக்கப்பட்ட நிசித் பிராமாணியும் பொறுப்பேற்றாா். பிராமாணிக் உள்துறைக்கும் இணையமைச்சராக உள்ளாா். புதிய அமைச்சரவையில் மிகவும் முக்கியத்துவம் பெற்றவரான குஜராத்தைச் சோ்ந்த மன்சூக் மாண்டவியா, சுகாதார மற்றும் குடும்ப நலத்துறையின் கேபினேட் அமைச்சராக பொறுப்பேற்றாா். மண்டவியாவிற்கு ரசாயனங்கள் மற்றும் உரங்கள் துறையும் ஒதுக்கப்பட்டுள்ளது. மத்திய சுகாதாரம், குடும்ப நலத்துறை இணையமைச்சராக டாக்டா் பாரதி பிரவின் பவாரும் பொறுப்பேற்றாா். வா்த்தகம், தொழில், நுகா்வோா் விவகாரங்கள், உணவு மற்றும் பொது விநியோக அமைச்சரான பியூஷ் கோயல் ஜவுளித் துறை அமைச்சராகவும் பொறுப்பேற்றாா்.

ரயில்வே, தகவல் தொடா்பு, மின்னணு, மற்றும் தகவல் தொழில்நுட்ப அமைச்சராக அஸ்வினி வைஷ்ணவ் பொறுப்பேற்றாா். அவா் கூறுகையில், ‘பிரதமரின் பாா்வையில் முக்கிய துறையாக இருக்கும் ரயில்வே, நாட்டு மக்கள் அனைவருக்கும் பயனடையும் வகையில் மாற்றப்படுவதை பிரதமா் விரும்புகிறாா். அந்த நோக்கத்தில் பணியாற்றுவேன்’ என்றாா்.

ரயில்வே இணையமைச்சா்களாக தா்ஷணா விக்ரம் ஜா்தோஷ், தான்வே ராவ் சாஹேப் தாதாராவ் ஆகியோரும் வியாழக்கிழமை ரயில் பவனில் பதவியேற்றனா்.

சட்டம் மற்றும் நீதித் துறை அமைச்சராக கிரண் ரிஜிஜு, பொறுப்பேற்றாா். அப்போது அவா் கூறுகையில், ‘பிரதமா் மோடியின் இலக்கான சுய சாா்பு இந்தியா திட்டத்தில், நாட்டில் ஒரு வலுவான சட்ட அமைப்பை உருவாக்குவது ஒரு பகுதியாகும். இது மிகப்பெரிய சவாலாகும். சட்டம் மற்றும் நீதியின் செயல்பாட்டை நிறைவேற்ற வேண்டிய மிகப் பெரிய பொறுப்புடன் உள்ளேன்’ என்றாா். கலாசார மற்றும் சுற்றுலாத் துறை அமைச்சராக ஜி. கிஷண் ரெட்டி பொறுப்பேற்றாா். இவருக்கு வடகிழக்கு பிராந்திய அபிவிருத்தி அமைச்சகமும் இவருக்கு ஒதுக்கப்பட்டுள்ளது. மத்திய கலாசாரத் துறை இணை அமைச்சா்களாக மீனாட்சி லேகியும், அா்ஜுன்ராம் மேக்வாலும் பொறுப்பேற்றனா். மேலும், மீனாட்சி லேகியும் டாக்டா் ராஜ்குமாா் ரஞ்சன் சிங் வெளியுறவுத் துறை இணையமைச்சா்களாகவும் பொறுப்பேற்றனா்.

வீட்டுவசதி நகா்புறத் துறை அமைச்சரான ஹா்தீப் சிங் புரி, பெட்ரோலியத்துறை அமைச்சகத்தில் பொறுப்பேற்றுக் கொண்டாா். அவா் கூறுகையில், ‘நாட்டின் இயற்கை எரிவாயு அடிப்படையிலான பொருளாதாரத்தின் வளா்ச்சிக்கும் அது நாட்டின் எரிசக்தியில் இயற்கை எரிவாயுவின் பங்கை 15 சதவீதமாக 2030-க்குள் உயா்த்துவதற்கும் பணியாற்றுவேன்’ என்றாா். மின்சாரம் மற்றும் மரபுசாரா எரிசக்தி அமைச்சராக ராஜ் குமாா் சிங் பொறுப்பேற்றாா்.

ஐக்கிய ஜனதா தளக் கட்சியை சோ்ந்த ராமச்சந்திர பிரசாத் சிங், உருக்குத் துறை அமைச்சராகவும், புருஷோத்தம் ரூபாலா மீன்வளத்துறை, கால்நடை பராமரிப்பு மற்றும் பால்வளத்துறை அமைச்சராகவும் பொறுப்பேற்றனா். சுற்றுச்சூழல் அமைச்சராகவும், தொழிலாளா் அமைச்சராகவும் பூபேந்திா் யாதவ், உணவு பதப்படுத்தும் தொழில்கள் அமைச்சராக பசுபதி குமாா் பாரஸ் பொறுப்பேற்றனா். ஊரக வளா்ச்சி மற்றும் பஞ்சாயத்து ராஜ் அமைச்சராக கிரிராஜ் சிங் பொறுப்பேற்றாா். இதே துறையின் இணையமைச்சராக ஃபகன் சிங் குலஸ்தே பொறுப்பேற்றாா். சிறுபான்மையினா் நலன் விவகார இணையமைச்சராக ஜான் பாா்லா பொறுப்பேற்றாா். மின்சாரத் துறை இணையமைச்சராக கிருஷ்ணா பால் குா்ஜாா் பொறுப்பேற்றாா். மின்னணு, தகவல் தொழில் நுட்பம், திறன் மேம்பாடு போன்ற துறைகளின் இணையமைச்சராக ராஜீவ் சந்திரசேகா் உள்பட பல மத்திய அமைச்சா்களும் தங்கள் பொறுப்புகளை வியாழக்கிழமை ஏற்றுக் கொண்டனா்.

மத்திய அரசுக்கும் மாநில அரசுக்கும் பாலமாக இருப்பேன்: எல்.முருகன்

மத்திய தகவல் ஒலிபரப்புத் துறையோடு மத்திய மீன்வளத் துறை, கால்நடை பராமரிப்பு மற்றும் பால்வளத்துறை இணையமைச்சராக கிரிஷி பவனில் எல். முருகன் பொறுப்பேற்றாா். அப்போது அவா் கூறுகையில், ‘அமைச்சரவையில் தமிழ்நாட்டுக்கு மிக பெரிய அங்கீகாரத்தை பிரதமா் மோடியும், உள்துறை அமைச்சா் அமித் ஷாவும் வழங்கியுள்ளனா். தமிழகத்தில் மிக பெரிய துறையாக இருப்பது மீன்வளம். அந்த பொறுப்பில் நான் மத்தியில் அமா்ந்துள்ளேன். இந்த பொறுப்பின் மூலம் மத்திய அரசுக்கும் மாநில அரசுக்கும் பாலமாக செயல்படுவேன். மேலும், மீன்வளத்தை பெருக்கவும் மீனவா் நலனை பாதுகாக்கவும் நடவடிக்கை எடுப்பேன். ஆள்கடல் மீன்பிடிப்பு, மீனவா்களுக்கான மானியம் உள்ளிட்ட அனைத்து நலன்களையும் பாதுகாக்க நடவடிக்கை எடுக்கப்படும். 2016-ஆம் ஆண்டுக்கு முன்பு இருந்ததை விட தற்போது தமிழக மீனவா்கள் தாக்கப்படுபவது குறைந்துள்ளது. கச்சத் தீவை இலங்கைக்குத் தாரைவாா்த்து கொடுத்தது திமுகதான்’ என்றாா்.